Марий Элыште «Юлым тазаҥдымаш» да «Яндар вӱд» проект-влакым илышыш пуртымо паша палемдыме жап деч ончыч шукталтеш.
7 февральыште Марий Элым вуйлатыше Юрий Зайцев Москваште Россий Федерацийын чоҥымо паша да илыме-коммунал озанлык министрже Ирек Файзуллин дене вашлийын. Нуно «Юлым тазаҥдымаш» да «Яндар вӱд» федеральный проект-шамычым илышыш пуртымо, Йошкар-Олаште канализаций коллекторым капитально олмыктымо шотышто технический пунчалым лукмо, республикыште илыме верым чоҥымо, 2023 ийлан палемдыме паша нерген мутланеныт.
Россий Минстройым вуйлатышын палемдымыж почеш, регионышто кумдыклам комплексно вияҥдыме пашалан кугу тӱткыш ойыралтеш.
«Марий Элыште кызыт 13 тыгай кумдык уло, да 139,3 гектар мланде шуко пачеран пӧрт-влакым, чумыржо 820 тӱжем квадрат метр илыме верым, чоҥаш палемдалтын. Тидыже регионым вияҥдаш пеш сай йӧн», – манын И.Файзуллин.
Росстатын иктешлымыж почеш, 2022 ийыште Марий Элыште 435,8 тӱжем квадрат метр илыме верым чоҥымо – тидыже палемдыме показательын 112,9 процентше лиеш.
«Яндар вӱд» федеральный проектым илышыш пуртымо пашат сайын шукталтеш. Республикыште вӱдым ситарыме кандаш объектым чоҥаш палемдыме, нылытыштыже пашам уже тӱҥалме. Кызыт Килемар районысо Арде селаште да Вӹзӹмйӓр посёлкышто вӱд пучым шупшыт, Морко районысо Чодраялыште да Арын селаште вӱдым налме объектым, тыгак У Торъял посёлкышто 1-ше №-ан водозаборышто вӱдым пушкыдемдыме станцийым чоҥат.
Ю.Зайцев Минстройым вуйлатышылан проект-влакым илышыш пуртымо паша нерген каласкален, тыгодым чоҥалтше коммунал инфраструктурын республикын правительствыжлан кӱлешан улмыжым палемден, молан манаш гын тудо калыкын илышыжым палынак саемдышаш.
«Яндар вӱд» ден «Юлым тазаҥдымаш» проект-влак Марий Эл правительствын контрольыштыжо улыт. Нуным илышыш пуртымо дене регионысо калыклан йӱшаш вӱд ситышын лиеш, пӱртӱс поянлык аралалт кодеш. Канализацийын эрыктыме сооруженийжым уэмден олмыктымо дене Юлыш лавыран вӱд шагалрак йоген пураш тӱҥалеш. Ме палемдыме чыла пашам сайын да жапыштыже шуктымылан кугу тӱткышым ойырена. Республиклан тӱткышым ойырымыланда да полшымыланда тауштем», – манын регионым вуйлатыше И.Файзуллинлан.
Вашлиймаш годым «Юлым тазаҥдымаш» да «Яндар вӱд» проект-влакым илышыш пуртымо чыла пашан палемдыме жап деч ончыч шукталтмыж нергенат ойленыт. 2022 ийыште республикна «Юлым тазаҥдымаш» федеральный проектым илышыш пуртымо шотышто чыла обязательствым тичмашын шуктен. Проектын кышкарыштыже ныл объектым чоҥаш да уэмден олмыкташ палемдыме, кокытыштыжо паша жап деч ончыч шукталтеш. Мут толмашеш, Йошкар-Олаште да Параньга посёлкышто канализацийын эрыктыме сооруженийжым уэмден олмыктат.
Марий Эл Республикым вуйлатышын администрацийжын информаций пӧлкажын уверже негызеш М.ИВАНОВА ямдылен
