УВЕР ЙОГЫН

Пайрем пайдалын эртен

Самырык-влакын кечышт лӱмеш кодшо шуматкечын Йошкар-Олаште, Тӱвыра да каныме рӱдӧ паркыште, «Марий самырык тукым слет» площадке пашам ыштен. Тудым Мер Каҥаш ден Йоча да подростко-влакын организацийлаштын «Эр вий» ушемышт» региональный мер организацийышт эртареныт.

Погынышо-влаклан пайдалын да веселан каналташышт тушто поян программе темлалтын. Мутлан, республикысе районла гыч толшо команде-влаклан калык модмаш-влак дене турнирым эртареныт. Иктешлымаш почеш,

1-ше верым Медведево районысо Руш Кукмарий школ гыч «Школын активистше-влак» команде сеҥен налын. Кокымшо верыш Звенигово район Ташнур ял гыч «Ташнур» команде лектын. Кумшо вер дене Оршанке район Кугунур школ гыч «Шонанпыл» команде палемдалтын. Тыгак У Торъял район Токтарсола школ гыч «Онар» ден Медведевысе Йоча усталык пӧртын «Вдохновение» командышт ты турнирыш ушненыт, но ончыл верлашке лекташ чулымлыкышт изиш гына ситен огыл.

Ты кечын тиде площадкыш толшо-шамычлан мастер-класс-влак темлалтыныт. Мутлан, иктыштыже Екатерина Тетерина пылыжгӧржым да аралтышым ышташ туныктен гын, весыштыже Елена Костина аралтыш курчакым кузе ышташ лиймым ончыктен.

Тиде площадкыштак марий самырык еш-влаклан конкурс лийын. Тудым эртарыше-влак кокла гыч иктыжын, Галина Ласточкинан, каласкалымыж почеш, таҥасымашке чылаже вич еш ушнышаш ыле, но тӱрлӧ амаллан кӧра коктынжо толын кертын огытыл. Тыге тушто кум еш: Волжский район гыч Федоровмыт ден Александровмыт да Йошкар-Ола гыч Оразаевмыт – таҥасеныт.

Конкурсышто кум тур лийын. Икымшыже «Визитке» маналтын. Тушто  кажне еш шкеж нерген каласкален. Кокымшышто вате-марий кокласе вашкылым, икте-весым сайын палымым ончыкташ кӱлын. Кумшо усталык дене кылдалтше лийын. Тушто, мутлан, «аза» мут логалын гын, аза нерген мурым муреныт, «ньога» мутым ойырен налыныт гын, погынышо-влакым икшывылан келшыше калык модыш дене модыктеныт. Тыгак кум ешат йомакым каласкаленыт.

Конкурсышто икымше верыш иканаште кок еш – Федоровмыт да Александровмыт – лектыныт. Кокымшо вер дене Оразаевмыт еш палемдалтын.

Л.Камалетдинова

Фотом Мер Каҥашын соцкыл лаштыкше гыч налме

Опубликовать в Одноклассники

Добавить комментарий