Россий мучко тиде арням – 1 гыч 9 октябрь марте – Туныктышо-влакын кугу арняшт семын увертарыме, да тудо шушаш Туныктышын да наставникын идалыкыштлан старт семын лиеш.
Палемдыме кечылаште элнан чыла регионыштыжо образований системын пашаеҥже-влаклан пӧлеклалтше мероприятий-шамыч эртат. Эн ончычак Россий кӱкшытан «Идалыкын туныктышыжо», «Идалыкын директоржо» профессионал мастарлык конкурслам иктешлат. Тыгак «Идалыкын мастерже» конкурс лиеш. Ял ден селаласе школын туныктышыжо-влакын форумыштышт «Россия 1» телеканал дене «Классная тема» икымше шоушто лийше шым туныктышын презентацийыштым ончыктат.
5 октябрьыште, Туныктышын кечынже, «Идалыкын директоржо», Идалыкын туныктышыжо», «Идалыкын воспитательже», «Российын педагог-психологшо», «Российын педагог-дефектологшо», «Идалыкын мастерже», «Шӱмем йоча-влаклан пуэм» всероссийский конкурслаште сеҥыше-влакым саламлаш тӱҥалыт. Кугыжаныш Кремль полатыште ял ден селаласе туныктышо-влакын съездыштын делегатше, педагогический вузла гыч ончылъеҥ-влак да молат погынат.
6 октябрьыште педагог-влакын «Туныктышо – Российын ончыкылыкшо» Россий кӱкшытан форумышт, почмо урок ден туныктышо-блогер-влакын мастер-классышт лиеш.
Марий Элыште Туныктышо-влакын кугу арняштышт марафон, флешмоб, конкурс, вашлиймаш-шамыч эртаралтыт. А 4 октябрьыште Туныктышын кечыжлан пӧлеклалтше торжественный мероприятийыште ик эн виян педагог-влакым саламлаш тӱҥалыт.
Г.Кожевникова
