Республикысе Марий тӱвыра рӱдер пеленысе «Падыраш» йоча фольклор ансамбль «Зимний триумф» тӱнямбал сымыктыш конкурсышто шке усталыкшым ончыктен да «Вокал» номинацийыште икымше степенян диплом дене палемдалтын.
Ты конкурс дене кылдалтше проектым РФ Тӱвыра министерстве, «Интернациональный тӱвырам вияҥдыше да полышым пуышо фонд» тӱнямбал рӱдер, Куштымаш дене ЮНЕСКО-н тӱнямбал советше дене пырля эртареныт.
А мыланна ты коллективын изи ӱдыр ден рвезыже-влакым да тудын уста вуйлатышыже, Марий Эл тӱвыран сулло пашаеҥже Эльвира Петровам тӱнямбал кӱкшытан наградым налме дене саламлаш да ончыкыжымат кугурак сеҥымашке шуаш тыланаш гына кодеш.
С.Носова
Снимкыште: «Падыраш» ансамбль.
М.Скобелевын фотожо.
