Пеледыш пайрем Пӱнчер отын Тумер аланыштыже Агавайрем кумалтыш дене тӱҥалын.
Молан Тумер алан манын йодыш лектеш, очыни. Кумалме верыште онапулан кок кугу пӱнчым ойырымо, но йырваш ончалат гын, вигак шекланет, тушто самырык тумо-влак вийым налын кушкыт. Ынде кумалме верыш ончычсо семын йыр савырнен огыл, а Изи Какшан эҥер гоч ыштыме мотор кӱвар гоч вончен, иканаште логалаш лиеш. Тушто кастене электротул волгалтара. Ты кумдыкысо вӱдыштӧ эсогыл вӱдчача пеледеш. Тидат куандарыде огеш керт.
Агавайрем – шулыкын озаже, палемдат онаеҥ-влак. Лач ты шулыкым налаш манын, ты гана шукын кумалаш толыныт. Пошкырт, Удмуртий, Татарстан кундемла, Екатеринбург, Тюмень, Москва олала гычат. Эр гычак йӱр йогыш, но тудымат кумалтышым виктарыше онаеҥ ден кумалаш толшо калык пӱртӱсын пуымо шулыкшо семынак шке ӱмбакышт нальыч манаш лиеш. Ош Кугу Юмылан тулыш надырым пыштымеке, онаеҥ-влак сугыньлымо ойыштым каласышт.
Кумалтышым республикысе Марий юмыйӱла ушемын тӱҥ онаеҥже Александр Таныгин виктарен. Тудлан республикысе икмыняр район, тыгак Российысе марий кундемла гыч толшо онаеҥ-влак йӱлам шукташ полшеныт.
Кумалме чесым авызлымеке, Ош Кугу Юмылан, пӱртӱслан, кумалше-шамычлан, икте-весылан тауштымеке, аланым йытыраен коден, чылан Пеледыш пайрем тӱҥалме верыш тарваненыт.
Михаил Скобелевын фотожо.
