МАРИЙ ЙӰЛА

Тӱҥ онаеҥ А. И. Таныгинын У ий пайрем дене саламлыме мутшо:

Ош Поро Кугу Юмына, поро дене вуйнам савена эртен кайыше ийлан! Аралтыш, Шулык, Серлагыш, Перке дене мемнам кодымыжлан.

О, поро дене толын шого мемнан Пӱрышына! Марий калыклан у идалыкыште пуэн шого поро пӱрымашым.

О, поро дене толын шогыжо Мер Кугу Юмына! Йӱла ден йӱла, тӱс ден тӱс, йылме ден йылме, калык ден калык коклаште пуэн шого поро каҥашым.

О,  поро дене толын шогыжо мемнан Аралтышна, Серлагышна. У идалыкыште арален шогышт тул деч, кугу вӱд деч, кугу мардеж деч, йот калыкын осал шинчаж деч да тӱнямбал мор деч. Иза-шольо, ака-шӱжар, тулар- тулаче-влак, тендан еш кышкарда,  тӱланен, тӱзланен шогыжо, тендан кинде-шинчалда, ӱстембал кӧргӧ йӧрварда пургыжалт шогыжо. Тендан вольыкда, кайыквусыда эре  шке йӱкышт дене шӱм-чондам куандарен шогышт. Тендан мӱкш отарда шем пыл гай нӧлталт шогыжо. Мӱй клат ден амбарда мӱй пуш дене ӱпшалт шогышт.

У ий  дене! У пиал дене! У каут дене! Эсен, таза лийза!

Снимкыште: А.Таныгин

 

Опубликовать в Одноклассники

Добавить комментарий