Пӧртым – шке проект почеш
Шернур район Чашкаялыште лиймына годым Максимовмытын кок пачашан пӧртышт мыланна поснак келшыш. Тиде суртын озаже пашам йӧратыше манын шоналтышна, молан манаш гын чылажымат шот-рат дене ыштыме.
Икымше пачашыште кевыт верланен, сандене оралтым мыланна кевытче Валентина Актаева ончыктыш. Максимовмыт ты кечын мӧҥгыштышт лийын огытыл, вес кундемыш сатулан кудалыныт. Нунын дене телефон дене мутланышна. Вате-марий шкешт нерген радамлын каласкалышт. Юлия Айметовна тиде кундемыштак шочын, Алексей Михайлович – Торешкӱвар ялын шочшыжо. Варажым Максимовмыт Глазырин ялыш илаш кусненыт. Пӧръеҥ шке жапыштыже «Знамя» колхозым вуйлатен. Суртоза кызыт амалкалчылан ышта.
Суртыштым Максимовмыт 2007 ийыште шке проект почеш чоҥеныт. Пӧртым ошо да силикатный кермыч дене нӧлтеныт. Пӧрт кок пачашан, эсогыл эркер уло. Эркер – тиде пӧртын фасадше деч ончыко лектын шогышо ужаш.
Икымше пачашыште кевыт верланен гын, кокымшыштыжо оза-шамыч шкешт илат. Суртыш пурмо капкаже моткочак сӧрал. Тудым кӱртньӧ воштыр гыч таптеныт. Тыгодым капка кок лончо гыч шога. Кокымшыжым йошкар поликарбонат гыч ыштыме.
Пӧртын леведышыж ден саварже – канде профнастил гыч. Суртын ешартыш пӧлемжым кудывече могырым пластик сайдинг дене комыжлымо. Оралте шеҥгелне, балкон йымалне, пӱтырналтше виноград кушкеш. Мутат уке, кызыт тудо але мала, но вашке помыжалтеш. Пече воктене лӱмегожым шындыме, тыгак саскан пушеҥге-влакат койыт. Озаватын пеледышым кушташ йӧратымыже шижалтеш, молан манаш гын лум йымалне пеледыш подставке-шамыч койыныт.
Нунын ошалге-кандалге тӱсан верандыштат шкешотан. Кызыт тушто теҥгылым, вер гыч верыш кусараш лийше лӱҥгалтышым, моло кӱлешан арверым аралат. Лум шулымеке, чыла тиде кудывечым сӧрастараш тӱҥалеш.
Максимовмытлан таум каласымеке, нунылан чыла сайым тыланымеке, шке пашана дене умбаке ошкылна.
Михаил СКОБЕЛЕВ,
Лидия ШАБДАРОВА.
Михаил Скобелевын фотожо.
