Марий Элын Ялозанлык да продовольствий министерствыжын палдарымыж почеш, арня ончыч республик мучко икияш культурым 155476 гектар мландыште ӱдаш палемдыме ыле. А 18 майлан сӱрет могай?
Тунам эн сайын У Торъял ден Медведево кундемлаште тыршеныт ыле. Тунам нуно 90 % показательыш шуыныт. А теҥгечылан налмаште, Марий Турек, Оршанке да Юрино районлаште паша утларак сайын ушнен. Икымшыштыже планым 101 (28944 гектар мландыш ӱдымӧ), кокымшышто эсогыл 111 (8009 гектарыште), кумшышто 100 %-лан (33 гектарыште) шуктымо.
Икияш пырчан да пурсан культурым тений республик мучко 104151 гектарыште ӱдаш палемдалтеш. 18 майлан нуным 101623 гектар кумдыкыш ӱдымӧ. Тидыже 98 % лиеш. Икмыняр районышто пашам тӱрыс мучашленыт. Южышт эсогыл планым эрталтенытат. Мутлан, Оршанке районышто паша 111 %-ште, Медведево районышто – 104, Шернур ден Марий Турек районлаште – 103, Юрино районышто 100 %-ыште ышталтын.
Пареҥгым шындыме шотышто 18 майлан сӱрет тыгай. Эн сайын паша Волжский районышто воранен. Тушто палемдыме 29 гектар гыч 24 гектарышкыже шынденыт. Тидыже 83 % лиеш.
Курыкмарий районышто чылаже 2525 гектарыште ты пашам шуктышаш улыт гын, изарнялан 1766 гектарым але 70 %-ым авалтеныт.
Кумшо верыште – Медведево район. Тушто палемдыме 74 га гыч 45 гектар кумдыкышто ты сомыл ышталтын. Тидыже 61 % лиеш.
Ялозанлык да продовольствий министерствын палдарымыж почеш, кызытеш пареҥгым Марий Турек, У Торъял, Оршанке да Советский районлаште шындаш эше тӱҥалын огытыл. Палемдыме моло пакчасаскамат Кужэҥер, У Торъял да Параньга районлаште 18 майлан але шынден огытыл.
Л.Камалетдинова
