ЯЛОЗАНЛЫК

Ой-каҥаш аршаш: Чапле нӧшмӧ – пел лектыш

Календарь почеш шошо толын гынат, уремыште эше йӱштӧ, лум кия. Сад-пакча тургым мартеат жап эше уло. Но южо окнаште эр-кас еда йошкар але канде тӱсан тул коеш. Тиде сад-пакчазе-влак росоталан ешартыш волгыдым пуат. Нине еҥ тӱшка декабрь-январьыште изишак каналтен шукта ала уке – у тургымым тӱҥалеш веле: тӱрлӧ рок вартышым, йоҥгытым ямдыла, кушкыл нӧшмым ӱда, росотам ончен кушта, нӧшмым ямдыла… Таче ме пытартышыж нерген мутым луктына. 

 Кызыт нӧшмым ужалыше компаний-влак моткоч шукын улыт. Чаманен палемдыман, нунын кокла гыч чыланжак огыл чапле продуктым ужалат, начар качестван нӧшмым темлыше-шамычат шукын улыт. Тидымак шотыш налын, шошо тургымлан уто роскот да ойго деч посна ямдылалтме правил-влак дене палдарена.

Роскотыш ида пуро

Нӧшмым налаш тарваныме деч ончыч инвентаризацийым ыштыза: ончалза, мо ӱмашсе деч кодын да теният йӧра. Лачшымак могай нӧшмым налаш кӱлмым кагазыш возыза. Кевытыш списке деч посна логалында гын, шагалрак налаш тыршыза.

Ойыртем уке огыл

Нӧшмым икмыняр кевытыште ончыза, тудын акшым таҥастарыза. Тыгеже ик сатун тӱрлӧ акан лийын кертмыжым шке ужыда. Южгунам тиде ойыртем икмыняр лу теҥгешкат шуэш.

Иквереш налаш йӧнанрак

Нӧшмым шкетын огыл, а тӱрлӧ сайт полшымо дене тӱшкан налза – тыге тудо палынак шулдын лектеш.

Кевытат тӱрлӧ лиеш

Изи рынкыште, пазарыште, супермаркетыште налме нӧшмӧ лотерей гай: икте сайын шыта, весе – уке. Киоск рынкыште ма пазарыште икымше ий веле огыл пашам ышта, сад-пакчазе-влак тудым моктат гын, ӱшанаш лиеш.

Нӧшмым налме эн сай вер – специализироватлыме кевыт. Молан? Икымше, тыште квалифицироватлыме консультацийымат пуат, рынкыш лукмо у сату денат палдарат, могай нӧшмым молан налаш пайдалымат умылтарат. Кокымшо, специализироватлыме кевытлаште качествын контрольжо эре кӱшнӧ, тылеч посна нуно селекционно-семеноводческий фирме-влак дене кылым кучат. Кумшо, специализироватлыме кевытлаште кӱлешан документ эре уло, тидын дене келшышын, нӧшмын качестве сертификатшым ик гана йодмекак ончыктен кертыт.

Кумданрак — «Марий Эл» газетын
2018 ий 2 мартыште лекше номерыштыже лудын кертыда.

Маргарита ИВАНОВА.   

Опубликовать в Одноклассники

Добавить комментарий