Пасу паша тӱҥалмеш жап шукак кодын огыл. Тений тудо, ончылгоч шотлымо почеш, кодшо ийысе деч варарак тӱҥалшаш, вет ты гана лум ятырлан шукырак возын да мландат утларак кылмен. Но ял калык ага тургымлан эше талукын икымше кечылаж гычак ямдылалташ тӱҥалын. Тудо умыла: шошо кече идалыкым пукша. У техникым налын, тоштыжым ачален да кызытат олмыкта, урлыкашым ямдылен, ӱяҥдышым умбакыже шупшыкта.
Тений республикыштына ӱдышаш кумдык 295 тӱжем гектарыш шуэш, тидыже кодшо ийысе деч кок тӱжем гектарлан шукырак. Икияшым 152 тӱжем гектарыш вераҥдыман, тидлан 108 тӱжем гектар мландым кылмаш куралын кодымо. Кокияшым 45 тӱжем гектарыш ӱден кодымо ыле, планже 40 тӱжем гектар лийын. Пасу пашам эртараш кугыжаныш 110 миллион теҥге субсидийым ойырышаш.
Районлам ончалаш гын, эн «киндан» Марий Турек районышто ты гана пырчан шурным 28,9 тӱжем наре гектарыш ӱдаш палемденыт. Тидыже кодшо ийысе деч 1550 наре гектарлан шукырак. Кодшо шыжым 7,2 тӱжем гектар кокияшым ӱден коденыт, тышечын 944 гектарже – кокияш шыдаҥ. Кокияш теле гоч удан огыл илен лектын, 90 процентше сайын аралалтын. Лектышым кугемдаш манын, район минеральный ӱяҥдышым 3,3 тӱжем тонным налаш лийын улмаш гын, кызыт марте 3,6 тӱжем утла тонным кондымо.
Пӱтынь республикым налаш гын, эн кугу тӱткыш тиде кечылаште нурыш лукшаш техникым ямдылен шукташ ойыралтеш. Нурыш тӱрлӧ маркан 1633 тракторым лукташ палемдыме. Кызыт марте 1,5 тӱжемжым ачален ямдылыме. Ӱмаште шошо агаште 1580 трактор пашам ыштен. Эн шуко, 327 трактор, Медведево районышто уло, Курыкмарий районышто – 268. Нуным лишыл кечылаште ямдылен шуктат.
Озанлыклаште 598 культиватор шотлалтеш, тышечын 540 олмыктымо. Чылаже 284 дискаторым пасушко лукташ лийме, тышечын 255 ачалыме. Тырма 6,5 тӱжем уло, тышечын 91 процентшым ямдылен шуктымо. 509 сеялкым кучылташ лийме, 436 ачален ямдылыме. Шошо агам эртарен колташ 2,5 тӱжем наре тонн дизтопливе кӱлеш, кызытеш 44 процентшым шапашлыме. Бензиным пел тӱжем тонным кондыман гын, шӱдӧ тонным шапашлыме.
В.СМОЛЕНЦЕВ
