2026 ийым Россий Президент Владимир Путин Российысе калык-влакын икоян улмо идалык семын увертарен. Марий Элыште тудым эртарыме шотышто организационный комитетым чумырымо. Икымше погынымашыжым Марий Элым Вуйлатыше Юрий Зайцевын кӱштымыж почеш Марий Эл Правительстве Председательын Икымше алмаштышыже Евгений Курмаев вӱден. Тудо ушештарен: республикна Москваште 5 февральыште Российысе калык-влакын икоян улмо идалыкым вияш эфирыште почмаште лийше элысе 15 регион коклаш пурен.
«Марий Эл – моткоч шке шотан кундем, тыште 50 утла тӱрлӧ калык курымла мучко келшен ила. Кажне калыкше, тудын тӱвыраже ик тичмашын тӧр праван ужашышт улыт», – палемден Евгений Курмаев.
Марий Эл Республик Правительстве Председательын алмаштышыже – Тӱвыра, савыктыш да калык-влакын пашашт шотышто министр Константин Иванов Российысе калык-влакын икоян улмо идалыкым эртарыме паша план дене палдарен. Шуктышаш паша радам 64 тӱрлӧ мероприятийым авалта.
Тӱвыра аланыште эн ончычак Музыкант-влакын икымше всемарийский форумыштым палемдыман. Тушко «Волгенче» рӱдерысе усталык алмаштышын йочаже-влак ушнат. Тыгак искусство йоча школлаште тунемше-влаклан конкурс, концерт, лекций да мастарлык класс-влак лийыт. Апрельыште кундемыштына калык тӱвырам ончыктышо «Йошкар сарафан» лӱман конкурс, майыште кокымшо Всемарийский хореографий конкурс, балет артист-влакын да хореограф-влакын Всероссийский конкурсышт, калык куштымашым ончыктышо-влакын да хореограф-постановщик-влакын республикысе конкурсышт лийыт.
Икмыняр шанче-практик конференций эртаралтеш. Тиде – «Колумб лудмаш», «Марий Эл Республикыште этнологийым шымлымаш: историй да у», «Кызытсе парадигмыште Юл-Чолман кундемысе калык-влакын йӱлаш пурышо да сылнылык тӱвырашт».
Идалык мучко Марий Элыште шукертак йӱлаш пурышо кава йымалысе «Кеҥеж тургым», финн-угор калык-влакын театрыштын «Майатул» фестивальышт, А.Эшпай лӱмеш опер искусство фестиваль, Российысе национальный республикла да йот элласе руш театр-влакын «Келшымаш кӱвар» фестивальышт ончышо-влакым ӱжыт.
Республикысе тоштер ден книгагудо-влакатпашашке ушнат. Нуно дизайн да декоративно-пикладной мастарлык шотышто Россий кӱкшытан «Памашшинча» ончерым, «Российысе калык-влакын талешкышт» регионкокласе телекӱварым, Самырык-влакын усталыкыштым ончыктышо «БиблиоАРТ» фестивальым да моло мероприятийымат вораҥдарен колтат.
12 июньышто, Россий Кечын, кугу концертыште республикысе чыла районла гыч коллектив-влак, «Евразийын йӱкшӧ» Российысе музык проектын участникше-влак выступатлат.
Марий Элысе Спорт министерстве шуко мероприятийым темлаш тӱҥалеш.
Мероприятий-влакым эртарымашке «Российысе калык-влакын Ассамблейышт» Пӱтынь Российысе мер-кугыжаныш организацийын регионысо пӧлкажын еҥышт ушнат. Россий Федерацийысе калык-влакын пашашт шотышто Федерал агентствын кӱштымыж дене Йошкар-Олаште Российысе Калык-влакын пӧртыштышт Марий Элыште Российысе калык-влакын икоян улмо идалыкым эртарышаш мароприятий-влакым шуктымым виктарыме шотышто Проектлык рӱдӧ офис ышталтын.
Геннадий Сабанцев ямдылен.
