Йошкар-Оласе городской больницыште, вӱргорно кӧргым ульрайӱк дене шымлыме аппарат дене пайдаланен, икымше операцийым ыштеныт.
Палемдыме аппарат коваштым шӱтен пурымо годым коронар вӱргорнын мынярак локтылалтмыжым да тудым эмлыме радамым рашемдаш кучылталтеш.
– Вӱргорно кӧргым ультрайӱк дене шымлыме йӧн миокардын пӱсӧ инфарктше да стенокардий годым коронар артерийын корныжым, стентированийын качествыжым, стентын верланымыжым да тичмашын почылтмыжым чын аклаш полша, – каласкала Йошкар-Оласе горбольницын диагностикым ыштыме да эмлыме рентгенохирургический йӧн-влак отделенийжын вуйлатышыже Алексей Шубин. – Тиде молан тынар кӱлешан? Операцийым ультрайӱк дене эскерыме годым стентым шындыме кум тӱҥ йодмаш шукталтеш: икымше – имплантын тӱржӧ огеш лончешталт, кокымшо – стентым шындыме верыште стеноз (корнын аҥысыреммыжым тыге маныт) огеш лий, кумшо – тудо тичмашнек гаяк почылтеш. Икманаш, стент сайын почылтшаш, а тидым аппарат гына чын аклаш полша. Тидыже стентым магистральныйлан шотлалтше кугу артерийыш шындыме годым поснак кӱлешан. Вӱргорно кӧргым ультрайӱк дене шымлыме аппарат пациентлан операцийым палынак сайын ышташ полша.
Эмлымверым вуйлатыше-влакын тыршымышт дене отделенийлан УЗИ-лан веле огыл, вӱр коштмо фракционный резервым рашемдашат датчик-влакым ойыреныт.
– Тыгеат лиеда, ангиографический шымлымаш вӱргорнын 50-55 процентлан туртмыжым ончыкта, но тудын критический улмыжым да стентым шындаш кӱлмым умылаш неле. Датчикым вӱргорно мучко коштыктена да тушто давленийын тӱрлӧ улмыжым ужына. Умылыдымаш вигак рашемеш: миокардын инфарктше лийын, стенокардий вияҥын кертме лӱдыкшым иземдаш манын, стентым шындаш, вӱргорным почаш да миокардыш вӱрлан толаш йӧным ышташ кӱлеш, – палемда Алексей Юрьевич. – Тидланже аппаратыш кокымшо опцийым шындыме. Икманаш, вӱргорно кӧргым ультрайӱк дене шымлыме аппаратыште эн шагалже кок йӧн уло.
Стентым экстренно огыл, а план почеш шындыме деч ончыч имплантын «волен шичме» кумдыкшым ончалаш лиеш – кӱлешан участке локтылалтын огыл гын?
– Тымарте тидым чокым манме гай ыштыме: атеросклероз уке гай чучеш, пышкемат пытыш ала-мо, тугеже стентым тиде кумдыкыш шындена. А тушто участке пужлен улмаш! Тидын дене атеросклеротический пышкемын тичмашлыкшым пытарена, да рестеноз манме вияҥеш, коронар вӱргорно угыч аҥысыремаш тӱҥалеш. А вӱргорно кӧргым ультрайӱк дене шымлыме аппарат стентым шындаш келшыше верым раш ончыкта, – оборудованийын ойыртемже дене палдара хирург. – Ультрайӱк полшымо дене ме артерийыште тыгыде вӱргорно-влакын ойырлымыштымат ужына. Южгунам ӧрдыжкӧ кайыше вӱргорныш логалаш моткоч йӧсӧ, тудын лачшымак кушто ойырлымыжым муаш неле. А аппаратын датчикше проводникын корныжым йоҥылыш деч посна рашемдаш полша. Тиде опций артерийын йӧршын петырналтмыже да проводникым кушко колташ кӱлмым умылыдымо годымат – ӱшанле эҥертыш.
Ӱмаште отделенийыште шӱмын артерийыштыже 1100 операцийым ыштеныт. Тений поснак неле патологиян пациент-влаклан тыгай операцийым эртарыме годым специалист-шамычлан эше вӱргорно кӧргым ультрайӱк дене тергаш йӧн лиеш.
М.ИВАНОВА
Фотом интернет гыч налме
