Пайрем кумыл
Орган йӱк ӧрыктарен
Йоча-влакым аралыме тӱнямбал кечын «Мариэнергошто» филиалысе профсоюз организаций полшымо дене тысе пашаеҥ-влакын йочаштлан Э.Сапаев лӱмеш Марий кугыжаныш опера да балет театрыште орган концертым ончаш йӧн пуалтын.
Ӧрыктарыше семӱзгарым колышташ шымле утла йоча погынен. Нуно тышке республикысе тӱрлӧ район РЭС-лаште ыштыше ачашт-авашт дене пырля толыныт, шукышт – икымше гана. Тусо страсбург орган Санкт-Петербургысо Мариинский театрыште шындыме деч виянрак. Концертмейстер, органист Арсений Ушаков семӱзгарын йӧнжӧ дене палдарен, тудын виян йӱкшӧ дене ӧрыктарен.
«Орган концерт ойыртемалтше семже дене йоча-влакым колышташ да умылаш кумылаҥден. Ме самырык тукымын сылнылык шижмашыжым вияҥдаш тыршена, тидлан профсоюз организацийна эреак полша», – каласен филиал вуйлатыше Сергей Хлусов.
Концерт деч вара йоча-влаклан Тӱвыра да каныме паркын аттракционышкыжо билетым пуымо. Нуно тушто ачашт-авашт дене пырля жапым веселан эртареныт, пайрем кечын нӧлтшӧ кумылым налыныт.
Юрий ИСАКОВ.
Снимкыште: театрыш – унала.
Фотом «Мариэнергон» пресс-службыж деч налме.
