Йошкар-Олаште да Параньга районышто канализацийын эрыктыме сооруженийжым олмыкташ палемдыме пашан пеле утла ужашыжым шуктымо.
15 декабрьыште Марий Элым вуйлатыше Юрий Зайцев Россий Федераций Кугыжаныш совет комиссийын пашаче группыжын да Правительственный комиссийын Россий Федерацийыште региональный вияҥмаш шотышто президиумжын заседанийыштышт участвоватлен.
Заседанийым Москван мэрже Сергей Собянин ден Российын чоҥымаш да илыме-коммунал озанлык министрже Ирек Файзуллин видеоконференцкыл йӧн дене эртареныт.
Участник-влак субъектлаште лӱдыкшӧ илышым ыштыме, регионлаште мобилизоватлыме граждан-влаклан да нунын ешыштлан социально полшымо мере-шамычым шуктымо, тыгак национальный проект-влакым илышыш пуртымо йодышлам онченыт.
Марий Элыште правопорядкым эскерыме да сай илышым арален кодымо пашам республикым вуйлатыше Юрий Зайцев шке контрольыштыжо куча. Регионышто социально полшымо мере-влакым кумдаҥдыме, тидын шотышто республикна Юл кундем федеральный округышто вич ончыл субъект коклашке пура.
Марий Эл кугу объект-влакым чоҥымо пашам чарныде шукта. Тений ЖКХ сферлан кугу тӱткышым ойырымо. «Юлым тазаҥдымаш» федеральный проект кышкарыште чыла мероприятий шукталтын толеш. Йошкар-Олаште да Параньга посёлкышто канализацийын эрыктыме сооруженийже-влакым уэмден олмыктат. 2022 ийыште тидлан 438 миллион теҥгем ойырымо, оксам тичмашнек кучылтмо.
Йошкар-Олаште канализацийын эрыктыме сооруженийжым 55 процентлан уэмден олмыктымо, Параньгаште – 53 процентлан.
Марий Эл Республикым вуйлатышын администрацийжын увер паша пӧлкажын уверже негызеш М.ИВАНОВА ямдылен
