Марий Элын образований да науко министрже Лариса Ревуцкая Москвасе тӱнямбал кӱкшытан образований салонышто республикнан паша опытшо дене палдарен.
Мероприятий кыщкарыште эртыше «Ончыкылыкын экономикыжлан образований» форумын эксперт сессийыштыже тудо Лариса Ревуцкая Марий Элыште кыдалаш профессионал образованийын регионысо модельже нерген каласкален. Тиде модель дене келшышын мемнан республикыште икымше профессийлан тунемме программылан, паша верым пуышо-влак дене каҥашен, единый йодмашым ыштыме. Йодмашым шукташ педагог-влаклан методике полышым пуымым, программылан регионысо бюджет гыч целевой оксам ойырымым палемден. «Пырля пашам ыштыме лектыш: ик тӱжет наре тунемше практикым регионысо 19 колледжыште эрта», – палемден тудо.
Мероприятийыште лиймыж годым Лариса Ревуцкая Марий Эл Образований да науко министерстве ден Москвасе тӱнямбал образований салон коклаште вашкыл ойпидышыш кидпалыжым пыштен. «Тиде мемнан регионлан у кӱкшыт. Москвасе тӱнямбал образований салон – элнан ончыл опытшым шарыше моткоч кугу вашкыл платформо. Пеҥгыдын ӱшанем, партнёр семын пашам ыштымаш мемнан образований системым вияҥдаш йӧным ышта. Ме йочасад, школ, колледж ден техникум-влакын материально-технический базыштым уэмдаш, эксперт сетьым кумдаҥдаш, тунеммашке инноваций йӧным пурташ палемденна», – каласен Лариса Ревуцкая.
Г.Кожевникова
Фотом Марий Эл Образований да науко министерствын соцкылысе лаштыкше гыч налме
