2 июньышто Чарла кремльыште «Марий Элыште ыштыме» ончер-ярмиҥга лиеш.
Тудо Россий предпринимательствын кечыжлан пӧлеклалтеш да регионыштына сатум ыштен лукшо 60 утла организацийым ушышаш. Тиде – агропромышленный комплекс предприятий, потребительский обществе, кресаньык озанлык, мӱкшым ончышо да предприниматель-влак. Ончер кышкарыште «Марий бренд-влакым шӱкен толмаш» темылан пӧлеклалтше «Йыргешке ӱстел» йыр мутланымаш лийшаш.
Ярмиҥгаш толшо-влак верысе сатум налын, тӱрлӧ конкурс ден кидпашалан туныктымо мастер-классыште участвоватлен кертыт. Мероприятийым республикысе Марий тӱвыра рӱдерын усталык коллективше ден артистше-влак сӧрастараш тӱҥалыт. Ярмиҥга 10 шагат гыч 16 шагат марте шуйна.
С.Носова
