Килемар район Арде профессионал техникумышто тунемыт гына огыл, нуно шке кидышт дене ончыкылыкыштым чоҥат.
Марий Элым вуйлатыше Юрий Зайцевын полшымыж дене ты тунемме верым уэмден олмыкташ йӧн ышталтын.
«Таче кыдалаш профессионал образований – элнан да регионын экономикыштлан кадрым ямдылыше апшаткудо. Кундемыштына верланыше кум техникумым уэмден олмыкташ республикын бюджетше гыч 47 миллион теҥгем ойыраш решенийым луктынам. Кӱкшӧ квалификациян специалист-влакым ямдылыме паша – мемнан тӱҥ задаче», – палемден регионым вуйлатыше соцкылысе лаштыкыштыже.
Арде профессионал техникумын студентше-влак тений гыч ончыкылык профессийыштлан жаплан келшыше мастерскойлаште тунемаш тӱҥалыт. Но эн тӱҥжӧ – нуно тунемме верым олмыктымым ӧрдыж гына ончен огыт шого, а шкештат тушто тыршат. Бригадыш чумырген, студент-шамыч штукатуркым пыштат, плиткым оптат да олмыктымо моло пашам ыштат.
Г.Кожевникова
Фотом Марий Эл Образований да науко министерствын соцкылысе лаштыкше гыч налме
