Марий Элын Калык илышым саемдыме шотышто министерствыже парикмахер, визажист, маникюр, моторлык салон мастар, профессиональный фотограф-влакым «Пöлекле мыланем моторлыкым!» поро кумыл акцийыш ушнаш ÿжеш.
Шошым пÿртÿс веле огыл, айдемат ылыжеш. Идалыкын лачшымак тиде пагытыштыже шуко еҥ у причёскым ышта, тÿжвал тÿсшым вашталта… Чаманен палемдыман, профессиональный стилист-влакын услугышт дене чыланжак пайдаланен огыт керт. Мутлан, интернат-пöртлаште илыше-шамычлан тиде – нигунам шукталтдыме шонымаш. Тидымак шотыш налын, «Пöлекле мыланем моторлыкым!» поро кумыл акцийым организоватлыме.
Ӱмаште парикмахер, маникюр мастар да визажист-влакын тыршымышт дене Кундыштÿр интернат-пöртыштö илыше ÿдыр-влакым сылнештарыме. А Калык илышым саемдыме шотышто министерствын ведомствыштыжо улшо социальный тöнежлаште 1000 утла ÿдырамаш ила да кажныже ончымо еҥ веле огыл, эн ончычак мотор айдеме лийнеже.
Палемдыме еҥ-влак кокла гыч шукынжо интернат-пöртлаште ÿмырышт мучко илат да моторлык мастар-шамычын тыршымышт деч вара, воштончышыш ончалын, шкем шке йöратен, куанен ончымым огыт пале гаяк. А чыла тидым эше фотографийыш кусараш гын, чон куанлан, юарлымылан мучашыжат огеш лий. Теве мом ме иквереш пöлеклен кертына!
Акций 2 гыч 10 март йотке шуйна.
Мастар-влак тушко 22-22-62 номеран телефон дене йыҥгыртен ушнен кертыт.
М.ИВАНОВА
