ТАЧЕ – Олма спас. Шуко фрукт кокла гыч олмам йӧратыше-влак шукынрак улыт, шонем.
Те, йолташ-влак, олмам йӧратеда? Тиде кечым кузе эртареда? Иктаж ойӧрым шуктеда мо?
Олег КУЗЬИНЫХ, Российын сулло, Марий Элын калык артистше:
– Садыштем олмапу-влак улыт. Тений чыланжак саскам огыт пу, но ик олмапушто пеш шуко. Тудым «Боровинка» манына. Олмаже пеҥгыде, чевер, телылан аралаш пышташ пеш келшен толеш. А мый пушкыдо олмам йӧратем, чеверым. «Белый налив» сорт пеш тамле, южгунамже чылт вошткойшо гай лиеш, тамжат мӱй гай. Тений эше олмам кочкын омыл. Ты саска гыч когыльо пеш келша, а коштымо олмаж дене чай моткоч тутло лиеш!
Наталья Зуевас, Марий Элын сулло артистше:
– Олмам чот йӧратем, вет тидлан ме изи годсекак поян лийынна да кызытат улына. Тынар олмапум шындымыжлан ачамлан моткоч кугу тау. Тамле саска дене мемнам веле огыл, уло ялым сийлен. Олмапужымат шукыштлан пуэн, кузе шындаш туныктен каласен.
Кугу Шокшемыште шочмо суртыштем мыняр олмапу уло, шотлен от путаре! Ачам уке лиймеке, Дина акам нуным онча, эскера, эрыкта, тоштыракшым кораҥден, уым налын шында. Ачамын шарапай олмапужым пеш чамана, чылт шкенжымак шарныкта: укшлаже тудын кидше гай, чевер олмаже авамын чурийже гай поро. Ты олмапу шуко саскам пуа, шыже велеш моткоч тамле лиеш.
Пакчаштына ачамын годым 80 утла олмапу лийын, а кызыт – иктаж 50. Дина акам эше грушым, виноградым, абрикосым ешарен шынден. Кажне кеҥежым шуко компотым, вареньым, пастилам ямдылена, тӱрлӧ саскам коштена. Олма когыльымат, шарлоткымат чот йӧратена.
Иван ЕВСЕЕВ, Унчо ял шотан илем администраций вуйлатыше:
– Пакчаште шым олмапу уло. Нунын кокла гыч икмыняржым ачам дене пырля шындыме. Кок олмапум ӱмаште йоча-шамыч дене эше ешарышна. Мыланна «Ранетка», «Башкирская красавица», «Грушовка», «Медовая» сорт-влак келшат. Олмам пӱчкеден коштена, тудын дене ямдылыме варенье, повидло, компот пеш тамле лийыт. А олма когыльыжо могай тутло!?
Ял мучаште илена да пакча мучко олмапум шынденна. Тусо олмам кажне эртен кайыше тамла, поснак йоча-шамыч чот йӧратат. Телым мераҥат олмапум нулташ толын кая, тудланат пеш келша.
Сергей КАРПОВ, Марий тӱвыра рӱдерын пашаеҥже:
– Олмам йӧратем. Но спас да вес йӱла-влакым тидын шотышто шекланымаш уке. Тений, ушет кая, олма ялыште пеш шочын. Тиде кечылаште унала коштым. Олмапу йымачын эртен кайыме годым вуй коҥгырашкем иктыже логале – пеш чот йогат. Авам, шӱжарем тудым пӱчкеден коштат. Телым компотым йӱаш тӱҥалына. Тыгак вольыклан да монь пукшат. Олмам гын чыла вережат тамлен лектым. Возымем годым эсогыл шадыргырак тамжат ушешем тольо, шӱвылвӱдат погыныш. А теве пошкудына шӱаш тӱҥалшырак олмажым терыс ораш компостлан оптен. Меат тыге ыштена. А куш пурет, чылт ӧрыктара. Уке да ойгырет, уло да шинчам карыкта.
А.БАЙКОВА ямдылен
Фотом еш альбом гыч налме
