Регион вуйлатыше Юрий Зайцевым «Трудовой подвиг города Йошкар-Олы в годы Великой Отечественной войны (1941-1945 гг.)» документ ден материал сборник дене палдареныт.
Савыктыш Кугу Сеҥымашлан 80 ий теммылан пӧлеклалтын. Тиражше – 500 экземпляр.
«Исторический шарнымашым арален кодаш, мемнан калыкын подвигше нерген самырык тукымлан палдараш манын, тиде эше ик ошкыл», – палемден тудо.
Сборник периодический печатьын архив документ ден материалже-влак негызеш чумыралтын. Тушто Марий АССР-ын рӱдӧолажын Кугу Отечественный сар годым Сеҥымашке пыштыме надырже, сар ден граждан продукцийым ыштен лукмыжо да ола калыкын, шкем чаманыде, шуктымо героизмже нерген ойлалтеш.
Саламлыме шомакым Марий Эл Кугыжаныш Погын председатель Михаил Васютин ойлен. Тудо книга дене кылдалтше проектын кӱлешлыкшым палемден. Мероприятийыште паша династий-влакын еҥышт лийыныт. Иктыжлан негызым Петр Перерезов пыштен. Тудо Кугу Отечественный сар годым, 1942 ий октябрьыште, Йошкар-Олаш эвакуироватлыме Вооружений наркоматын ОКБ-43 предприятийыштыже тыршен. Вара 297-ше №-ан заводыш кусареныт (кызыт «ММЗ» АО). 50 ий тушто ыштен. Тукымжо гычак Владимир Перерезов таче тӱҥ инженерын алмаштышыжлан – пӧлка начальниклан ышта, пашан ветеранже лӱмым сулен. Перерезов-Михеевмыт династий гыч «ММЗ» АО-што тӱрлӧ ийыште 28 еҥ тыршен. Чумыр стажышт – 500 ий.
2024 ийыште сборникым савыктышашлан Йошкар-Ола администраций пелен редакционный совет чумыралтын. Тушко оласе кучемын, регионысо правительствын, шанче сообществын, сар годым ыштыше предприятий ден организаций, тыгак архив, тоштер, книгагудо-влакын еҥышт пуреныт. Пашаче тӱшкам историй шанче кандидат Ольга Кошкина вуйлатен.
«Кугу Отечественный сар годым Йошкар-Олаште илыше-влакын героизмышт нерген шарнымашым арален кодаш полшышо сборникым ямдылымашке ушнышо чыла еҥлан тауштем. Тендан полшымо дене эше ятыр тукым историй факт-влак дене палыме лийын кертеш. Ты паша подвиг нерген шарнымаш, тукым-влакым ушаш, шочмо элым, шочмо верым йӧратыме шӱлышеш кушташ, у сеҥымаш-влаклан кумылаҥдаш тӱҥалеш», – каласен Юрий Зайцев.
Марий Эл вуйлатышын пресс-службыжын уверже негызеш Светлана Носова ямдылен.
