Марий Элым вуйлатыше Юрий Зайцевын тӱҥалтышыж почеш илышыш пуртымо «Таза республик» акций умбакыже шуйна. 25 июльышто Тазалык пункт Йошкар-Оласе Павленко уремыште верланыше 3-шо №-ан пӧртын кудывечыштыже пашам ыштен.
Проектын координаторжо-влак Ренат Магсумов ден Анна Агачева Йошкар-Оласе калыкын илышыжым саемдымашке виктаралтше мероприятийлаште эреак чолган участвоватлат.
– Рӱдоласе Тумер да Курыкӱмбал микрорайонлаште илыше-влак «Таза республик» проектыш кумылын ушненыт. Тидым Россий Армийын тӱвыра полатше ваштареш эртаралтше акций эше ик гана пеҥгыдемдыш. Калык дене мутланыме годым проект шотышто шуко поро мутым кольым. Йолташ-влак, таза илыш-йӱлам кучыза да тазалыкдам эскерыза! – манеш специальный военный операцийын участникше-шамычлан полшымо «Элым аралыше-влак» кугыжаныш фондын регионысо филиалжым вуйлатыше Р.Магсумов.
– Округышто шуктымо чыла пашам граждан-влакын илышыштым саемдымашке да шочмо Йошкар-Олам вияҥдымашке виктаралтын. Мыйын школыш коштшо эргым уло, сандене шке тазалыкым изинекак эскерыме койышым йоча пагыт гычак вияҥдаш кӱлмым моткоч сайын умылем. Таза да пиалан калыкан ола гына чынже денак мотор! – ешара А.Агачева.
Мер пашаеҥ-шамыч мероприятийын кышкарыштыже калык дене мутланат, акций нерген каласкалат да волонтёр-медик-влаклан полшат.
Тиде кечын медик ден волонтёр-шамыч 100 пациентлан эмлалтме да профилактикым эртарыме шотан полышым пуэныт.
М.ИВАНОВА
«Марий Эл» увер агентствын фотожо
