Курыкмарий межрайонный прокуратур Козьмодемьянскыште илыше 56 ияш пӧръеҥ шотышто уголовный делам тарватымым чынлан шотлен.
Следствийын рашемдымыж почеш, тений 11 январьыште Россий МВД-н ГИБДД-жын «Козьмодемьянский» отделжын регистрационно-экзаменационый отделенийыштыже тиде пӧръеҥ «Рено Дастер» автомобильжым кондыде учетыш шогалтышашлан кугыжаныш инспекторлан 5000 теҥге взяткым темлен. Но тудыжо оксам налаш тореш лийын, сандене пӧръеҥ преступленийжым мучаш марте ыштен шуктен огыл.
Тиде уголовный дела кузе кайымым да тудым шымлыме иктешлымашым Курыкмарий межрайонный прокуратур контрольыш налын, палдара Марий Элысе МВД-н УГИББД-жын пресс-службыжо.
Л.Камалетдинова
