4 декабрьыште Йошкар-Олаште Г.Константинов лӱмеш академический руш драме театрын вуйлатышыже, оласе Рӱдӧ каныме паркын директоржын ончычсо алмаштышыже Сергей Московцевым кученыт, палдара РФ Следствий комитетын Марий Элысе Следствий управленийже. Правам аралыше орган пашаеҥ-влак тудым паша кабинетше гычак вӱден наҥгаеныт.
60 ияш ончычсо алмаштыше «Тӱвыра да каныш рӱдӧ парк» учрежденийын 5 миллион наре теҥгежым арам кучылтмылан титаклалтеш.
Тиде преступленийым ыштымым ФСБ-н Марий Элысе управленийжын пашаеҥже-влак пален налыныт. Мо кузе лийме шотышто кызыт следствий кая. Тиде факт шотышто уголовный делам тарватеныт.
Ушештарыме семын палемден кодена: тений октябрьыште, паркын кызытсе вуйлатышыже Андрей Шестаковымат кученыт. Тудат кугу кугыт оксам арам кучылтмылан титаклалтеш.
Л.КАМАЛЕТДИНОВА