КУЧЕМЫШТЕ

Ойпидыш – сай полыш

5 июльышто Марий Элым вуйлатышын пашажым жаплан шуктышо Юрий Зайцев Шернур районысо Купсола ялыште опытан мӱкшызӧ да шуко шочшан еш оза, тыгак ӱмаште социальный ойпидышым ыштыше Сергей Шабдаров дене лийын.

С.Шабдаров мӱкшым шукертак онча. Тиде паша тукым гыч тукымыш кусна.  Кызыт ешысе «мӱй» йӱлам эргыже-влак шуят. Эртыше ийын еш оза социальный ойпидыш негызеш шке подсобный озанлыкым вияҥдаш окса полышым налын.

«Мӱкшым ончымо паша – тиде мыйын киндем да ешланна оҥай занятий. Кызыт кок отарна уло, тушто рвезе-шамыч пашам ыштат. Отарна-влак грант-шамыч кӱшеш вияҥыт. Самозанятый семын ыштыме ойпидыш почеш ойырымо 100 тӱжем теҥге окса мыланна сайын полшен – мӱйым электротул полшымо дене тулышо аппаратым, кок шикшарым, фильтрацийлан сеткым, кум костюмым налынна. Тымарте паша лектышна начаррак лийын, да тыгай полыш мыланна вияҥаш сай йӧным ыштен», – палдарен С.Шабдаров.

Ю.Зайцев 1 июль гыч Марий Элыште социальный контрактын суммыжым кугемдыме нерген ушештарен: ынде амалкалче пашалан 350 тӱжем теҥге ойыралтеш, озанлыкым вияҥдымылан – 200 тӱжем теҥге.

«Тиде пашам ышташ кумылан калыклан сайын полшышо йӧн, – манын тудо. – Мӱкшотар – социальный контрактын пашам йӧратыше еҥлан могай пайдам ыштымыжым ончыктышо чапле пример».

Шабдаровмытын мӱйышт тӱрлӧ конкурсышто эн сай семын ик гана веле огыл палемдалтын, а Сергей «Марий Эл Республикын эн сай мӱкшызыжӧ» конкурсышто сеҥышыш лектын.

Шабдаровмытым илемысе калык пагала. Нуно «Идалыкын ешыже» всероссийский конкурсышто кок ий почела сеҥеныт. 2019 ийыште РФ президент Владимир Путин еш институтым пеҥгыдемдымаште да йоча-влакым воспитатлымаште заслугылан Татьяна ден Сергей Шабдаровмытым «Родительская слава» орден дене палемдыме нерген указым луктын. Кум эргышт тӱвыра да сымыктыш аланыште «Будущее России» национальный премий да «Вятские Хваткие» всероссийский конкурсын гран-приж дене палемдалтыныт. Ава, Татьяна Шабдарова, «Педагог года-2021» медальын озаже.

С.Шабдаров Юрий Зайцевлан ешыж нерген кугешнен каласкален, шке озанлыкшым ончыктен да тутло мӱй дене сийлен.

Марий Элым вуйлатышын пашажым жаплан шуктышо Шабдаровмытын пашам йӧратымыштлан, сеҥымашыштлан ӧрын йывыртен да ончыкыжат у кӱкшытыш шуаш тыланен.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий