Кужэҥер районышто лиймыж годым Марий Эл вуйлатыше Юрий Зайцев кум пачашан у пӧртын пачерлаж деч сравочым кучыктен.
Кужэҥер посёлкысо аварий лийын кертме лӱдыкшан 7 пӧрт гыч 12 еш у пачеран лийын. Тылеч посна тулык да ача-ава деч посна кодшо икшыве-влаклан 11 пачерым ойырымо. Пачерла илаш пураш ямде улыт, кудывечыште модмо йоча площадкым, автомашина-влаклан парковкым ыштыме.
«Республикын виктемже да мый шкежат илыме верым ойырымо йодышым тӱткышыштӧ кучена. йӧрдымӧ да шӱкшӱ пӧртлаште илыше-влак у пачеран лийышт манын, Россий правительстве, Россий Чоҥымо министерстве полшат», – каласен Юрий Зайцев пӧртсий дене саламлышыжла.
Марий Элыште аварийныйлан шотлалтше илыме верла гыч вес вере кусарымаш «Илыме вер да оласе среда» нацпроект дене келшышын шукталтеш. Тиде программе почеш, 2023 ийыште 28,26 тӱжем кв.м. тошто пӧртым кораҥдыме, 2380 еҥлан вес илыме верым пуымо. А программе тӱҥалме жап гыч ончалаш гын, чылаже 87,69 тӱжем кв.м аварий лийын кертме лӱдыкшан илыме верым кораҥдыме, 5857 еҥлан у пачерым ойырымо.
Юрий Зайцевын мутшо почеш, 2023 ий мучашлан эше 7 шуко пачеран пӧртым чоҥен шуктышаш улыт. Тугеже 442 еҥ пӧртсийым пайремлен кертеш.
Кужэҥер район администраций вуйлатыше Сергей Михеев республик вуйлатыше Юрий Зайцевлан пӱсӧ йодышым решатлаш полшымыжлан таум ойлен, у пачерым налше-влак моткоч куаненыт манын ешарен.
Палемдыман, кажне пачер посна ырыкталтше тиде пӧрт Кужэҥер районышто –икымше.
Марий Эл Республикым вуйлатышын администрацийжын
информаций паша пӧлкажын уверже негызеш
Л.СЕМЕНОВА ямдылен
Д.РЕЧКИНЫН фотожо
