акций

Пум кеҥежым ямдылат

Республикыштына «Неотложка» поро кумыл акций умбакыже шуйна. 

«Неотложка» проект – тиде эн чот тӱнен илыше шоҥгыеҥ-влаклан продукт да пу дене полшымаш. Илалше ийготан граждан-шамычлан кочкыш набор ден пум чылт яра намиен пуымо паша Марий Элын Калык илышым саемдыме шотышто министерствыжын «Старость в радость» фонд дене кылым кучаш тӱҥалмыж гыч вийым налын.

Тӱнен илыше еҥ-влакын спискыштым верласе Калыкым социально обслуживатлыме комплексный рӱдер-влакын увертарымышт негызеш ямдылыме. Социальный службо-шамычын пашаеҥышт тӱҥлан шотлалтше продукт: макарон, шӱраш, пакчасаскан, шылан да колан консерве, сакыр, нугыдемдыме шӧр да моло сату – дене 5 тӱжем теҥгеаш 14 килограмм нелытан набор-влакым чумыреныт. Нуно шоҥгыеҥ-шамычлан кеч икмыняр жаплан куштылгын шӱлалташ, аныклыме окса дене эмым але кӱлешан арверым налаш йӧным ыштат. Ончылгоч шотлен лукмо почеш, кочкыш набор кум тылзылан ситышаш.

Социальный пашаеҥ-шамыч наборым тӱнен илыше шоҥгыеҥ-влаклан мӧҥгышкыштак намиен пуат. Республикыштына тыгай шотан полышым чылаже 294 еҥ налын. 2022 ийыште илалше-шамычлан тиде йӧн дене квартал еда полшаш палемдыме.

Тылеч посна, «Старость в радость» фонд коҥгашке олтен ырыктыман пӧртлаште илыше 123 илалше граждан ден пенсионерлан пум налын да намиен ястараш оксам ойырен. Тиде пашам уже тӱҥалме.

Чыланат палена, пум кеҥежым ямдылат, а илалше еҥым чон шокшо дене идалык мучко ырыкташ кӱлеш.

М.ИВАНОВА

Фотом интернет гыч налме

Опубликовать в Одноклассники

Добавить комментарий