Москваш миен коштмыж годым Марий Эл вуйлатыше Юрий Зайцев «Путешествуй» тӱнямбал турист форумын пашашкыже ушнен.
Тушто тудо «ТТ-Трэвел» ООО-н генеральный директоржо Владимир Рубцов дене ваш келшен пашам ыштыме нерген ойпидышым ыштен.
Ты документ республикын турист куатшым нӧлталаш, Марий Эл нерген утларак палдараш да мемнан деке толшо турист-влакын чотыштым шукемдаш полшышаш. Ойпидышыш кидпалым пыштымаште Федераций Совет председательын алмаштышыже Константин Косачев да Федераций Советын Обороно да лӱдыкышыдымылык шотышто комитет председательын икымше алмаштышыже Сергей Мартынов лийыныт.
– Регионышкына толаш кумылан турист-влакым ме шукемденак толшаш улына. Сай лектышна шуко. Пытартыш кум ийыште гына турист-влакын чотышт 30 процентлан кушкын. Пытартыш вич тылзыште гына Марий Элыш 360 тӱжем еҥ толын каен. Но ончыклыклан перспективе эше шукырак. Туроператор дене ваш келшен пашам ыштымаш ты пашаште сай лектышым налаш полшышаш, – каласен Юрий Зайцев.
Марий Эл кажне ийын всероссийский да тӱнямбал рейтинг-влакын топ-листлашкыже логалеш. Кодшо ийын республикына йотэллаште туризмым шӱкен толмо Discover Russia федерал программышке пурен. Кундемыште турист-влаклан келыштарыме кумдык-влакым вияҥдыме мастер-планым ыштыме. У туроператор дене вашкылым ыштымаш мемнан деке толшо уна-влакым вашлийме сервисымат саемдаш полшышаш.
Марий Эл вуйлатышын пресс-службыжын уверже негызеш Светлана Носова ямдылен.
