Рушарнян, 14 июльышто, «Россия 1» телеканалыште Андрей Малаховын «Песни от всей души» кас шоуштыжо музыкант, блогер Андрей Куклиным ончыктеныт.
Андрей Йошкар-Олаште шочын-кушкын, а кызыт Москошто ила.
Эфирыште тудо шукерте огыл возымо «Ну где же ты, девчонка» мурыжым мурен. Тудын мутшо ден семжымат шкежак возен.
Мурыжо кумылым нӧлтышӧ, уло зал калык тудын дене пырля мурен, куштен.
– Тиде муро тренировко гыч мӧҥгӧ кайымем годым шочын, – каласыш Андрей. – Ом уж гынат, кажне еҥын ончалтышыжым шижам.
А.Куклин сокыр-влак коклаште Российын футбол командыштыже модеш.
– Кум ияш марте моло йоча семынак мыят чыла ужынам, но вара прививкым ыштымеке, ик шинчам 70 процентлан ужмым чарнен. Эмлаш тӱҥалынна, но мӧҥгешла лийын. Тидлан вуйым ом саке, куанаш нимо огеш мешае.
Сокыр еҥ кузе футболла модеш? – йодыш шукыштым тургыжландара. Тыгодым эфирыште видеом чӱктышт. Тушто тудо тыге вашешта: «Капка кушто улмым палаш манын, покшеке колонкым пыштем, музык шоктымым колын, кушко мечым чумышашым палем.
Футболла 13-14 ияшыж годым Йошкар-Олаште модаш тӱҥалын. Телепередачыште воктеныже шинчыше-влакын йодышыштлан Андрей кумылын вашештен. Ты мутланымашым тыландат лудаш темлена:
– Мечын кушто пӧрдын кайымыжым кушеч паледа?
– Сокыр-влаклан модаш лӱмынак келыштаралтше мече уло, пӧрдын кайымыж годым йоча погремушко гай йӱк шокта.
– Ваштарешда толшо еҥым але мече дене тудын деч кораҥын кайыме нерген кузе паледа?
– Воктекем толшо еҥ «бой» але «вой» шомаклам ойлышаш. Испан йылме гыч тудо «лишемам», «толам» манмым ончыкта. Мутлан, мыйын ваштареш Тимур толеш гын, тудо «бой!» кычкыралшаш. Тыге ойлыдымыжлан кӧра мый тудын деке миен керылтам гын, тудлан штраф лиеш. Видеошто шкеат ужыда: ме чыланат петырыме шинча дене модына. Модмо годым ала трукышто иктажше ужаш тӱҥалеш але кеч изишак ужеш манме гыч кораҥаш манын, мыскара дене вашештыш пӧръеҥ.
– Андрей, те Москошто курерьлан пашам ыштенда маныт. Тиде чын?
– Туге. Тыланда иктаж-мом намиен шуктен огытыл гын, тугеже ала мый лийынам, – воштылалын пелештыш рвезе.
– Андрей эше видео-влакым монтироватла, – палдарыш телевӱдышӧ да видеом ончаш темлыш.
А туштыжо А.Куклинын мультиваркеш кочкаш шолтымыжым ужаш лиеш.
– Сниматлаш манын, телефоным кок пулвуй дене ишен кучем да вара шкеак монтироватлем. Мо оҥайже, кочкаш шолтымым войзыман видеом интернетыште эн шукын ончат, – ойла рвезе.
Андрей эше гитар дене мастарын шокта. Шкежак ты семӱзгар дене шоктен ончыкташ темлыш да чылаштым веселан мурыктыш.
Телеэкраныште республикнан чолга да чыла шотыштат талантан шочшыжо-влакым ужмеке, мутат уке, чон куана. А Андрей шотышто теве мом каласынем: кӧргӧ вий-куатан, тале рвезе. Ош тӱнян, илышын волгыдыжым, ярымжым чонжо да кид шӱмжӧ дене шижын моштышо рвезе йокрокланаш нимынярат огеш йӧрате. Соцкыл лаштыкшым ончалын лекмеке, раш коеш: ятыр мурыжо уло, начар тазалыкан-влак коклаште футболла модмыж дене 2023 ийыште Российын командыштыже ик эн сай нападающий лийын.
Таза лий, Андрей. Спортым йӧратымет, усталык да мыскара шӱлышет тек ончыкшымат илаш да ончыко каяш полшат.
А.БАЙКОВА
Фотом соцкыл лаштыкше гыч налме
