Кугу руш поэт Александр Сергеевич Пушкинын шочмо кечыже вашеш «Регион» мониторинг рӱдерын специалистше-влак 2ГИС сервис полшымо дене Российын могай кундемыштыже А.С.Пушкинын лӱмжӧ эн чӱчкыдын вашлиялтмым шымленыт.
Икымше верыште – Адыгей Республик, тудын почеш – Калуга область, кумшо верыш Марий Эл лектын. Шымлыме годым «Пушкинын индексше» манме дене пайдаланеныт, тыгодым лӱмлӧ руш поэт дене кылдалтше топонимикым да калык чотым шотыш налыныт. Рашемын, Пушкинын лӱмжым урем, театр, книгагудо, школ-влак нумалыт. Российыште «Пушкин» икмыняр фитнес-рӱдер, ресторан да бар, илыме микрорайон, эсогыл англичан да китай йылмым туныктымо образований рӱдер улыт. Марий Элым налаш гын, рӱдолаштына А.С.Пушкин урем да тудын лӱмеш сквер, тушто поэтлан 1980 ий 5 июньышто шогалтыме памятник, Изи Какшан серыште Пушкин ден Онегинлан шогалтыме памятникла дене кугешнена, тыгак Йошкар-Оласе 4-ше гимназий тудын лӱмжым нумалеш.
Л.СЕМЕНОВА
Снимкыште: Марий Элын калык поэтше Анатолий Тимиркаев Изи Какшан серыште верланыше Онегин ден Пушкинлан памятник ончылно.
Фотом А.Тимиркаевын архивше гыч налме
