Ныл ийысе сеҥымашнам ончыктышаш улына
Марий рӱдолштына эртыше XII Марий калык погыныш 438 делегат толеш.
31 октябрь — 2 ноябрьыште Йошкар- Ола Российын 20 регионжо гыч марий калыкнан тачысе кечыже, ончыклыкшо нерген тургыжланыше, тудым вияҥден колташ тыршыше эн чолга меръеҥже-влакым вашлиеш. Кузе ме нуным вашлияш тӱҥалына, пленар погынымаште, секцийлаште могай паша радамым да тӱвыра программым ямдыленна, тидын нерген эртыше кечылаште журналист- влаклан лӱмын чумырымо пресс-конференцийыште Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов ден марий Оньыжа Эдуард Александров палдареныт.
Нунын ойлымышт почеш, погынлан ямдылалтме паша икшырымын, шке радамже дене кая. Ты пашам правительстве кӱкшытыштӧ ыштыме оргкомитет виктара. Тудым регион вуйлатыше Юрий Зайцев вуйлата.
Константин Ивановын ойлымыж почеш, погыныш толшо-влаклан ме пытартыш погын деч вара эртыше пагытыште республикын сеҥымашыже-влакым ончыктышаш улына. Ик сеҥымашыже — рӱдола покшелне ыштен шогалтыме республикын Калык-влак келшымаш пӧртшӧ. Туштат погынын секцийласе заседанийже эрташ тӱҥалыт.
Тӱвыра программыште делегат-влаклан М.Шкетан лӱмеш марий кугыжаныш драме театрыш миен толаш йӧным ыштенна. «Кеҥеж йӱд» постановкым ончыктена. Тудым кугыжаныш филармонийын «Марий кундем» калык семӱзгар ансамбльже шке шоктымыж дене пойдараш тӱҥалеш.
Вес кечынже кастене, погын мучашлалтме кечын, уста шӱлышан тукымым ончен куштымо лектышнам ончыктена. Иктешлыше кугу концертыште чумыр марий йоча хорым, чумыр марий духовой, калык семӱзгар оркестр-влакым, чумыр марий куштышто «Волгенче» ансамбльым сценыш луктына. А икымше кечын кастене делегат-влакым «Марий парк» кумдыкышто верланыше кафеште эртыше «Марий кас» иктеш уша. Оргкомитет мер пашаеҥ-влак дене пырля чыла палемдыме пашам пырля шуктен толеш.
Эдуард Васильевичын ойлымыж почеш, погыным эртарен колтымо дене кылдалтше пашам ворандарымаште кугу таум Марий Эл правительствылан, Тӱвыра, савыктыш да калык-влакын пашашт шотышто министерствылан ыштыман. Чыла йодышым пырля шотыш кондымылан кӧра форумлан ямдылалтмаш сайын кая. Делегат-влакым вашлийме, вераҥдыме, кочкаш пукшымо дене кыдалтше йодыш шотыштат умылыдымаш уке.
Погын гыч погын марте пунчалыш лукмо чыла шонымашым Мер Каҥаш илышыш шыҥдара. А тидлан регионлаште илыше марий-влак дене сай кыл лийшаш. Погыным лачшымак шыжым, пасу пашам эртарымеке, эртараш регионлаштак йодыныт. Тачысе кечылан верлаште погыныш делегат-влакым ойырымо протокол-шамычым тергыме паша иктешлалтын. Нунын темлымаштымат погынышто каҥашыме йодыш радамыш пуртымо. 20 регион гыч марий-влак толыт. Погынын вич секцийжын пашажым тенийсе Еш идалык дене кылдыме. «Поснак «Еш, науко да цифровизаций» секцийыш ушнаш кумылан-влакын шукын улмышт куандара», – палемдыш Эдуард Васильевич.
Ушештарен кодыман, 21 октябрь марте погынышто пашам ышташ шонышо журналист-влак акредитацийым эртен кертыт.
Светлана Носова
Снимкыште: пресс-конференций годым.
Авторын фотожо
