Медведево районысо Пӱкшерме фольклор пӧртыштӧ «КÿслеКыл: мемнам кӱсле уша» этнофестиваль эртен.
Тудым Эльвира Куклинан вуйлатыме «Интеллектуал» тӱвыра-увер рӱдерже эртарен да организацийын 15 ияш лӱмгечыжлан пӧлеклен. Проектым «Добрая Марий Эл» фонд, Марий Элын Паша да Социальный аралтыш министерствыже да Россий президентын грант фондшо полшымо дене илышыш шыҥдарыме. Тӱҥ шонымашыже – кӱслем шоктымо йӱлам кумданрак шарен колташ, а кызытсе саманыште тудым калык-влак кокласе кылым, тыныс илышым пеҥгыдемдымаште утларак кучылташ тыршымаш. Проект кышкарыште эртарыме конкурсыш 70 наре участник – посна кӱслезе, ансамбль, фольклор коллектив, кидпаша мастар, дизайнер, тыгак СВО-н ветеранже-влак – ушненыт. Нуно Чуваш Республик, Моско область, Москва, Санкт-Петербург олала, Вологодский, Псковский да Сахалин областьла, Запорожский областьысе Куйбышевский район да мемнан кундемысе ола ден районла гыч лийыныт.
Фестивальын ик партнёржо – Марий Элыште СВО ветеран-влакын ассоциацийышт. Иктешлыше мероприятийыште ассоциацийын еҥже-влак выступатленыт.
Фестивальын тӱҥ площадкыже кӱсле дене шоктышо, тудын семже почеш мурышо да куштышо-влакын онлайн да офлайн выступленийышт эртеныт. Москва гыч лӱмлӧ кӱслезе, поэт Максим Гавриленко толын. Тудо кӱслем шоктымо годым руш калыкын историйже дене кылдалтше эпос-влакым каласкала. Элна мучко ятыр ий гастролироватла. Пытартыш ийлаште СВО участник-влак деке передовойыш, тыгак госпитальлаш кудалыштеш.
Алатырь гыч Александр Теплов тыгак кӱсле дене мастер-классым эртарен. Кӱсле сымыктыш дене кылдалтше пашам виктарыме нерген «йыргешке ӱстел» йыр мутланымаш лийын.
Фестивальын программыжым марий шӱлышан вургемым ыштыше-влак пойдареныт. Марий Элысе икмыняр брендын озашт шке коллекцийыштым ончыктеныт. Самырык дизайнер-влак пайремлан гына чийыме лекшашлык вургемым веле огыл, тыглай кечынат чиен лекшашлыкым ямдылат. Но кажне чиемыште марий калыкнан ойыртемже шижалтеш. Куэмжымат натуральныйым гына кучылтыт.
Чуваший гыч толшо лӱмлӧ дизайнер Виктория Язарова кызытсе жаплан келыштарыме костюм коллекцийжым сцене гыч ончыктен, мастер-классым эртарен.
Могай этнофестиваль команмелна деч посна? «Марий» сийгудын еҥже-влак шке коҥгашт дене миеныт да чесым ямдылыме мастер-классымат эртареныт.
Фестиваль «Кӱсле кыл» студийын иктешлыше мероприятийже лийын, но вуйлатышын ойлымыж почеш, тудо йӱлаш пурышаш. Эльвира Викторовна деч йодде ыжым чыте, кузе тудо фестивальышкыже Российын тӱрлӧ лукшо гыч мастар-влакым ушен кертын? Вашмутшо тыгай лие: «Мый шкеже тӱнялан почылтшо улам. Тӱрлӧ форум ден семинарыш ушнымемат чот полша. Ятыр оҥай еҥ дене палыме лияш йӧн лектеш. Шке воткыл лаштыкем вӱдымат – сай эҥертыш. Теве кызыт Российысе тӱвыра пашаеҥ-влакын ушемышкышт пуренам. Тудын гочат шуко сай кыл ышталтеш».
Светлана Носова
Фотом фестивальын воткыл лаштыкше гыч налме.
