Марий йӱлан чинче тушыжо:
«О, поро Ош Кугу Юмо! Пасушто шурно кугу томан лийын, уло кумдыкшо дене шӧртнялгымекше, тылат тауштен, уло тӱшка дене кидеш сорлам кучен, тӱредаш лектына…. У Кинде дене, у кочкыш-йӱыш дене Тыйым сийлена. Тыйын пӱрымашет мыланна ток илышым кондыжо. Шурно кышылым кугемде, поро деч поро Ош Кугу Юмо, перкем пу. Ситыже тудо ешланат, кугыжан порыс тӧрлашат, шужен еҥым пукшен лукташат. Шушаш у кинде дене мемнам куандаре. Кинде – илыш, мыланна тудо эн шерге. Чылалан кинде вуй. Кинде лиеш гын – чылажат лиеш. Санденак ме Тыланет, Ош Кугу Юмо, тӱҥалтыш мутнам илыш вийым пуышо кинде гыч тӱҥалына да эн ондак кӱсотыш наҥгайышаш шувышышкына Тылат лӱмлымӧ тичмаш киндым эше кастенак шовыч дене вӱдыл пыштена».
«Юзо ой» брошюр гыч налме, 1991 ий.
Черке йӱла почеш:
4 сентябрь – Юмын Аван Грузинский юмоҥажын кечыже.
Мӱкш отарым благословитлыме молитва:
«Чылам пӱрышӧ Юмо, нӧшмым благословитлыше да шукемдыше, да тудым мыланна кочкаш йӧршым ыштыше; о, мемнан Иисус Христос Господьна, Предтече да Тынеш пуртышо Иоаннын йодмыж почеш мемнан сӧрвалымынам чаманен колышт, шкендын поро кумылет дене мӱкшым порын благословитле да святитле, да тек нуно тыйын лӱмешет шке поян саскаштым Тыйын храметым да Тыйын святой алтаретым сылнештараш да сӧрастараш кондат, тыгак мыланна кучылташ йӧршым пуат. Тудлан чап да моктымаш курым-курым мучкак. Аминь».
«Марла молитва-влак» книга гыч налме,2005 ий
Шарнаш кодшо ой:
Пӱркытат вигак шулдыран ок шоч.
Пӱсӧ кӱзым огыт шумо.
Сай муро ок тошем.
Самырык годым вий куатле, а уш – шала.
Сар айдемым вашке вуеш шушым ышта.
Сар ошым шемемда, шемым ошемда.
Сар пиал кок тӱран керде гай: теве тышке пӱчкеш, теве тушко кереш.
Сарым шинча гына огыл, тупкоремат ынже уж.
А.Е.Китиковын «Марий калыкмут мутер» книгаж гыч налме,1990 ий.
Ӱмырым илен эртарышын каҥашыже:
«Кажне кастене шке деч йодса: «Мо 5 эн сай таче тендан илышыште лийын?»
Робин Шармын «200 уроков жизни» книгаж гыч.
С.Носова ямдылен
Снимкыште: ошма карьерыште.
Авторын фотожо
