4 мартыште, шуматкечын, С.Г.Чавайн лӱмеш калыкле книгагудыш сылне марий тӱран вургемым чийыше тынар шуко ӱдырамаш погынен ыле – иктыже весыж деч моторын койын! А мо тушто лийын? Республик кӱкшытан «Мунло» интеллектуал марафон-модмаш. Тудым «Саскавий» марий ӱдырамаш мер ушем эртарыш. Мероприятий 8 Март пайремлан пӧлеклалтын.
Команде-влак
Модмашыш 7 команде ушнен ыле – тиде Йошкар-Ола гыч самырык-влакын «Чечен вараксим-влак», Оршанке район гыч «Ший Какшан», Советский район гыч «Шонанпыл», Параньга район гычат тыгаяк лӱман команде, Звенигово район гыч «Юлвий», Морко район гыч «Чолпан», Кужэҥер район гыч «Зервика». Нине кундемла гыч толшо-влакым мокталтыде нигузеат огеш лий, вет нуно тыгай кугу чолгалыкым ончыктеныт, модмашке ушнаш лӱдын-вожыл шоген огытыл да кажныже 6 еҥан командым чумырен конденыт!
Таҥасаш тӱҥалмышт деч ончыч «Саскавий» ушем вуйлатыше Людмила Кошкина, книгагудо вуйлатыше Ирина Щеглова, Марий Элысе Рӱдӧ Марий Юмыйӱла ушем вуйлатыше Александр Бирюков чылаштымат шушаш 8 Март пайрем дене саламлышт да кажне командылан сеҥымашым тыланышт. А вара ӱдырамаш-шамычым саламлаш толшо бард мурызо-влак Геннадий Григорьев ден Геннадий Куклинын гитарым, Оршанке район гыч Елена Рыбакован баяным шоктымышт почеш погынышо-влак «Ава» мурым пырля муралтышт.
Кум тур
Модмаш-марафон кум тур гыч шогыш. Икымшыже «Лӱмлӧ марий ӱдырамаш-влак» маналтын. Йодыш-шамычым Йылмым, литературым да историйым научнын шымлыше В.М.Васильев лӱмеш марий институтын книгагудыжым вуйлатыше Галина Байкова ямдылен. Кокымшо турышто марий йылме да литератур дене кылдалтше йодыш-влак лийыныт. Нуным Надежда Федосеева, МарНИИЯЛИ-н вӱдышӧ научный пашаеҥже, ямдылен. Кумшо турышто марий йӱлам палымым тергеныт. Тудлан йодыш-влакым культурологий доктор Галина Шкалина чумырен.
Кажне турышто 10 йодыш гыч лийын. Тыге, мутлан, марий ӱдырамаш-влаклан лукмо икымше марий журнал кузе маналтмым да тудын тӱҥ редакторжо кӧ лиймым, икмыняр ожнысо мутын мом ончыктымыштым, ойырен налме почеламут корнылам кӧн возымыжым, произведений-влакын авторыштым, ятыр молым палаш кӱлын. Кажныжлан чын вашмутым пуаш манын, команде-влаклан вуйушыштым чотак пудыратылашышт логале. А теве калыкмут гын эсогыл ӱдырамаш-влакым шкеныштым эшеат пагалаш да аклаш таратыш, шонем. Мылам гын тудо ик эн чот келшыш! Команде-влаклан тудын тӱҥалтышыже пуалтын, а участнице-влаклан ойым чын шуяш кӱлын. Тудыжо тыге йоҥген: «Ӱдыр чодыра маскалан ок кай…» Умбакыже мо нерген ойлалтеш, палышда? Шагалын, очыни. А тушто тыге каласыме: «… тудо шке акшым пала». Тевыс кузе!
Почеламут корныла, сылне муро…
Тур-влак коклаште жюрин баллым шотлымыж жапыште мероприятийыш чумыргышо ӱдырамаш-влаклан поэтессе Зоя Дудина шке почеламутшым пӧлеклен лудо. Поэт Геннадий Сабанцеват сылнымут корнылаж дене куандарыш. МарНИИЯЛИ-н директоржо Людмила Григорьева, тиде шымлыше институтынак вӱдышӧ научный пашаеҥже Сергей Свечников саламлыме мутым ойлышт. Оршанке район гыч «Какшан сем» ансамбль ден бард мурызына-влак сӧрал мурылашт дене кумылнам нӧлтышт. Тыгак «Марий тӱр» рӱдер вуйлатыше Ираида Степанова тушко кидпашам ышташ тунемаш коштшо-влак дене пырля марий сӧрастарыш-шамычым ончыктыш да кажныж нерген каласкалыш.
Кӧ сеҥен?
А ынде таҥасымашын иктешлымашыж дене палдарена. «Мунло» республикысе интеллектуал марафонышто икымше верыш Морко район гыч «Чолпан» команде лекте. Кокымшо верым Советский район гыч «Шонанпыл» команде сеҥен нале. Кумшо верыш Звенигово район гыч «Юлвий» команде лекте. Чылаштымат уло кумылын саламлена! Нунылан пӧлекым да дипломым кучыктышт. Тыгак модмашыш ушнышо чыла командымат тӱрлӧ пӧлек дене куандарышт. Чыла тидым «Саскавий» марий ӱдырамаш ушемлан спонсор-влак ойыреныт. Нуныжым поснак палемден кодымо шуэш, молан манаш гын, пӧлекышт чылаштлан чот келшен! Тиде – «Плёс» фирме (вуйлатышыже Вячеслав Воронцов), Йылмым, литературым да историйым научнын шымлыше В.М.Васильев лӱмеш марий институт, «Йошкин» ООО (генеральный директоржо Владимир Аптулаев), индивидуальный предприниматель Борис Иванов.
Марафон умбакыже шуйна
Икымше верым сеҥен налше командылан тӱҥ приз «Саскавий» марий ӱдырамаш ушемын куснылшо кубокшо лийын, вет «Мунло» республик кӱкшытан интеллектуал марафон ынде кажне ийын эртаралташ тӱҥалеш.
Тек тыгак лиеш! Молан манаш гын, тудо шочмо йылмынам, сылнымутнам, тӱвыранам, йӱланам палаш, мондалтшыжым уэш шарналташ тарата да кумылаҥда. А тыге гын, моткочак кӱлешан паша ышталтеш! Адакшым тиде модмаш марий ӱдырамаш-влакым иктеш чумыраш полша. Икманаш, кеч-могай велым ончалаш гынат, тиде – моткочак пайдале паша.
Любовь Камалетдинова
Авторын фотожо
