Чодыра озанлык пашаеҥ-влакын профессионал пайремышт вашеш Марий Эл правительствыште ты отрасльыште ойыртемалтшын пашам ыштыше-влакым палемденыт.
Регион вуйлатышын лӱмжӧ дене правительстве председательын алмаштышыже Дмитрий Троицкий саламлен. Тудо палемден: чодыра отрасль элнан тӱзланымашыжлан да социально-экономически вияҥмашыжлан сай негызым ышта. «Марий Эл чодыралан эре поян лийын. Ужар кумдыкнам арален да кугемден толаш манын, кугу паша ышталтеш. 2019 ий гыч Марий Эл «Экологий» национальный проектын регионысо «Чодырам аралымаш» проектыш ушнен. Тудын тӱҥ шонымашыже – кажне ийын мыняр чодырам руэна, тунарак уэмден толаш. Республикыште тидлан спецтехнике ден оборудований налалтыт, агротехнический уход шукталтеш, чодыран билогический поянлыкышым арален кодымо, пушеҥгым шындыме паша вораҥдалтеш», – каласен Дмитрий Троицкий.
Ойлымыж почеш, 2019 ий гыч регионысо проект почеш пожар ваштареш кучедалме 61 техникым да 539 оборудованийым налме. Республикысе «Авиалесоохранын» тул ваштареш кучедалаш кучылтмо 103 техникыже уло.
Правительстве председатель алмаштыше шочмо кундемнан пӱртӱс понялкышым аралаен да шукемден толмылан, тул ылыж кертме лӱдыкшым кораҥден шогымылан тауштен. Чодыра отрасльнан СВО-што передовойышто улшо салтак-влаклан, нунын ешыштлан полшымыжымат палемден. Пытартыш кок ийыште гына 30 фур пиломатериалым тушко колтымо да 434 ешлан пум ойырымо.
Дмитрий Александрович отрасльыште тыршен ыштыше пашаеҥ-влаклан наградым кучыктен. Кужэҥер лесничествын чодыра мастерже Валерий Пирогов, Пригородный лесничествын директоржо Евгений Шепелев «Российын сулло лесоводшо» лӱм дене палемдалтыныт. А теве Куяр лесничествын Сурокысо участковый лесничийже Николай Смоленцев ден Оршанке лесничестве гыч чодырам оролымо да аралыме шотышто мастер Сергей Игнатьев «Марий Элын сулло лесоводшо» чап лӱмым налыныт. Моло сай пашаеҥ-влакланат тӱрлӧ кӱкшытан наградым кучыктеныт.
Чодыра отрасльыште тыршыше-влакым тыгак Марий Эл правительстве председательын алмаштышыже Степан Воронцов, Кугыжаныш Погын вуйлатышын алмаштышыже Владимир Мухин, республикысе профсоюз-влакын ушемыштым вуйлатыше Алексадр Майоров да молат саламленыт.
Марий Эл вуйлатышын пресс-службыжын уверже негызеш Светлана Носова ямдылен.
Снимкыште: ятыр ий чодыра озанлыкыште тыршыше да чапым налше еҥ-влак
Д.Речкинын фотожо.
