Кече утыр да утыр мландым ырыкта, кайык-влакынат сылне деч сылне мурышт кумылым нӧлта да уремыш лекташ ӱжеш. Теве вашке лумат шулен пыта, мланде кошка да сад-пакчазе-шамычын паша тургымышт тӱҥалеш. Тидлан иктышт ончылгоч ямдылалтыт: нӧшмым налыт, окна ончылнышт але волгыдырак иктаж верыште тӱрлӧ росотам куштат.
Йолташ-влак, те пакча тургымлан кузе ямдылалтыда? Шуко пакчасаскам шындеда мо?
Наталия АЛЕКСЕЕВА, М.Шкетан лӱмеш Марий национальный драме театрын актрисыже:
– Пакчагӧргым авам ончен кушта. Ончылгоч турлӧ нӧшмым налеш, посна яшлыклашке рокым опта да ӱда. Росотаже пеш шуко. Мланде ырымеке, нуным пакчаш кусаркала. Кеҥежым вара меат кертме семын вӱдым шаваш да шӱкшудым кӱраш полшена.
Людмила ДМИТРИЕВА, «Моркинская земля» газетын компьютер дене погышо операторжо:
– Морко посёлкышто илена, пӧрт воктенысе пакчана кугужак огыл гынат, чылажат ситышын кушкеш.
Кияр, помидор, ковышта, шере пурыс, кавун росотам ямдым пазарыште налын шындем. Кок йыраҥыш шоганым шындем, тыгаяк кумдыкым кешырым, тыгак эше йошкарушменым, петрушкым, укропым, салатым, редискым изин ӱдем. Такшым чылажат сайын кушкеш, ешлан сита. Пареҥгымат шындена. У ий марте шкенаным кочкына, а вара кок-кум мешакым налына але ял гыч акам пуэн колта. Ешна кугужак огыл: пелаш Озаҥ олаш пашаш кудалыштеш, кугу ӱдыр Йошкар-Олаште, а изиракше Орёл олаште тунемыт.
Юрий СОЛОВЬЁВ, прозаик:
– Мланде гыч лектын улына гын, тудын деч утлаш ок лий аман… Садлан кажне шошым чон вургыж вучена – мланде паша чонлан моткоч келша. Инструментым тергена, теплицыш лумым кышкена… А лоджийна тыгодым чылт оранжерейыш савырна, тӱрлӧ росота дене темеш – помидоржо, пурысшо, шоганже… Пытартыш жапыште «Эксибишен» манме шоганжым нӧшмӧ гыч куштена, тыге лектышыже пеш сай лиеш улмаш, шоган кугу да тамле шочеш. Адакшым ала-молан дыр пытартыш жапыште шинча сӧралым йодаш тӱҥалын. Пеледыш-влак утларак кумылым савырат. Пурет кудывечыш да ик вере, я вес вере изи кече-влак – эн ондак тюльпан ден нарцисс, вараже петуньыжо, пионжо, розаже… – сылнын волгалт шогат. Ончен йӧратет! Кумылет уке гынат, чонлан моткочак ласка лиеш. О-о, Кугу Юмо сай кечым пӧлеклыш аман, манын шоналтет, вий лектеш, кумыл кӱза!..
Вера ГОРОХОВА, «МЭТР» телеканалын корреспондентше:
– Шошо толеш – тиде сай, но пеленже моткоч шуко пашам конда – тиде уже весе. Пакча пашалан ончылгоч ямдылалташ жапемат уке да адакшым, эртыше ийым шотыш налаш гын, пакчасаскам шындаш вашкыман огыл. Ӱмаште ме чылажымат 26 июньышто гына шынденна. Мланде ырен шуктен, чыла жапыштыже лектын, кушкын да саскам пуэн.
Росотам ончен-кушташ тыгак йӧнем да жапем уке гаяк. Садлан тудымат мый ямдым налам. Ты пашаште акам кугу полышым пуа. Шуко шынден, чылалан ситара. Теплицыш кызыт лумым кышкыме жап. Но тиде мландын вӱдыжгылыкшӧ деч шога. Мемнан тудо ситышын, садлан ончалына, кӱлешлыкше уло але уке. Жап моткоч писын эрта, теве гына У ийым вашлийынна, а ынде пакча тургымат лишемеш. Тыгак чыла паша жапыштыже шукталтеш, шыжат шуэш.
А.Байкова ямдылен
Ю.Соловьёвын фотожо
