Марий театр сымыктышыште Параньга район Ермучаш ялын шочшыжо, артист Андрей БУСЫГИН шукертак чапым налын да калык пагалымашым сулен. Режиссёр-влакат утларакше мыскара шӱлышан, шоҥго пӧръеҥын але ачан рольыштым тудлан модаш ӱшанат. Тидлан капкылже, койыш-шоктышыжо, ойлен колтымыжо лачеш толыт. Мыскара образыште тудым ужаш калыкат тунемын шуын докан, садлан сценыш лектын шуэш ма уке, ик мутым огеш пелеште гынат, воштылаш тӱҥалыт.
Шукерте огыл Марий Элын сулло артистше Андрей Бусыгин 50 ияш лӱмгечыжым палемден. Тиде амал денак тудо 5 февральыште родо-тукымжым, йолташыже, пошкудыж ден театрым йӧратыше-влакым бенефисышкыже чумыра. Тидлан артист шукерте огыл сценыш лукмо «Китай кува» спектакльым ойырен налын. Тушто тудо 65 ияш шкешотан пӧръеҥын, тӱҥ героиньын икымше йӧратымашыже Павел Ивановичын, рольжым модеш.
А ушышто – самырык пагыт
Бенефисым эртараш артистын эше вес амалжат уло: Москосо кӱшыл театральный училище деч вара М.Шкетан лӱмеш марий драмтеатрыш пашаж толмыжлан – 25 ий.
– Жап шижде эрта, а самырык пагыт – эреак ушышто. Мутат уке, театрыш толмеке, кумдан палыме да пагалыме артист, аксакал-влак Виктор Дмитриевич Бурлаков, Василий Михайлович Горохов, Галина Николаевна Иванова-Ямаева, Венера Гавриловна Саввина, Иван Семенович Никитин дене пырля ик сценыште «Саликаште» Терейым, «Мӱкш отарыште» Орӧзӧйым, «Кеҥеж йӱдыштӧ» Марка кумым да ятыр моло спектакльыште рольым модмо волгыдо шарнымашым коден. Нуным ончен, мастарлыкыштым шекланен, мыламат кушкаш йӧн лийын, – эртыше жапым порын шарналтыш А.Бусыгин.
25 ий жапыште Андрей Витальевичын иктаж 50 утла спектакльыште: «Сӧсна поминка» (Васлий), «Эргымлан кузык» (Энсай Кажаев), «Ӱжында?» (Изибай), «Шочмо кечын» (Митук), «Йӧратымаш да кӧгӧрчен-влак» (Митя), «Осал чоялык да йӧратымаш» (гофмаршал Фон Кальб), «Ший Пампалче» (Сапанай), «Шӱдыран тат» (Василич) – рольжо уло. Персонажшын ойлымо шомакшым возыман кагаз папкыже шеч кутыш кӱжгытыш шуэш. Кажне рольжым тудо сайын пала да шарна. Шкеж манмыла, суткаште кеч-могай жапыште, тудын деч тиде але вес рольым модаш йодыт гын, йодмыштым тыманмеш шуктен кертеш.
Сценыште артист шкенжым моткоч ӱшанлын куча, образым келгын почын пуа, но иктаж-кӧ дене шинчаваш мутланымыж годым аптыранымыже поснак палдырна. Мо дене тиде кылдалтын?
– Шкеат ом пале, такшым изинекак тыгай улам, – манеш да воштылын колта. – Воспитаний докан тыгай.
– А сценыштыже огыда вожылыс… – йодым.
– Сцене ден илыш – тиде кок тӱрлӧ тӱня. Сценыште режиссёрын каласымыжым, ӱшанен пуымо рольжым сайын модман, образыш келгын пурыман. Спектакльыште шке нерген мондалтеш, геройын илышыжым илен лекташ тыршет, – шонкала артист.
Бусыгин илышыштыжат мыскара деч посна ок чыте. Тидым мутланыме годым шкеат сайынак шижым.
– Мыскара полшымо дене илышыште чын корным муаш, тӱрлӧ нелылык гыч куштылгынрак лекташ лиеш, – каласыш А.Бусыгин. – Но южгунамже моткоч серьёзнын ойлем, но садак воштылыт. Мутлан, «Ачийжат-авийжат…» спектакльыште (Санун ачажым модеш – авт.) сценыш лектам да «Кутыреда мо?» манын йодам. Еш кокласе туманлымаш годым каласыме ойыштем воштылаш нимогай амал уке гынат, калык воштылеш.
Кушеч тыгай мастарлык?
Андрей Бусыгин аваж деч ныл ияш кодын, ачаже верысе колхозышто механик-инженерлан тыршен, гармоньым моткоч сайын шоктен. Тиде мастарлык Сергей ден Рудик изаже-влакланат куснен. Нуным онченак, Андрей Витальевич гармоньым шупшкедаш тунемын.
!! Материалым тичмашнек «Марий Эл» газетыште лудса!!!
