Марий Элыште Туризмын тӱнямбал кечыже эртен.
Ты кечын республикысе тоштерлаште кундемна дене палдарыше экскурсий, лекций, мастер-класс, ончер, почмо кече да молат эртаралтыныт.
Туризм индустрийын профессионалже, эксперт да уна-влакын тӱҥ пайрем вашлиймашышт тений «Вӱдлэнд» парк-отельыште лийын. Тушко погынышо да кундемыштына туризм сферыште тыршыше-влакым Марий Элын промышленность, экономике вияҥмаш да торговльо министрже Владимир Халюзин саламлен.
Вашлиймашын паша программыж дене келшышын, ойыртемалтше проект-влак дене палдареныт. Мутлан, специальный военный операцийын ветеранже, Мужество орденын кавалерже да «Герои Марий Эл. Талешке-влак» кадр программын участникше Павел Попов «Йошкар-Ола мучко патриотизм шӱлышан маршрут» проектше нерген каласкален. Тӱҥ шонымашыже – рӱдолам тудын военный историйже да кызытсе патриотический событийла дене кылден ончыкташ.
«Мемнан эҥер» проект дене Марий Элыште унам вашлийме шотышто посол Андрей Кошкин палдарен. Тиде – Марий Элыште йогышо эҥер-влак дене кылдалтше цифран атлас. Проектын тӱҥ шонымашыже – кундемнан туризм куатшым почаш: уна-влаклан тугай верым ончыкташ, кушко йолын пурашат куштылго огыл. Тыгак эҥер мучко онлайн «ияш» йӧным ышташ. Проект почеш республикыштына 100 километр утла кужытышто йоген кайыше чыла эҥерым цифраҥдыме. Тений августлан иммерсивный VR-турым савыктыме. Тудын полшымыж дене республикыштына Юл, Элнет, Вӱтла эҥер-влак мучко онлайн «ийын каяш» лиеш. Мо оҥайже, тыгодым вӱд йымалысе объектлам, мутлан, вӱд йымаке кайыше чодырам – ужаш, тыгак фото полшымо дене 1970-ше ийласе дене кызытсым таҥастараш йӧн уло.
Йылмым, литературым да историйым шымлыше В.М.Васильев лӱмеш марий институтын вӱдышӧ научный пашаеҥже, историй науко кандидат Сергей Свечников марий тӱр да тудын мом ончыктымыж нерген каласкален, Юл кундем кугыжаныш технологий университетыште сервис да туризм кафедрым вуйлатыше Светлана Васина кызытсе жаплан келшыше путешествийым эртарыме йӧн дене палдарен, а Россельхозбанкын Марий филиалжын директоржын алмаштышыже Александр Герасимовын выступленийже элгӧргӧ туризмым вияҥдыме дене кылдалтше лийын.
***
Туризмын тӱнямбал кечыжлан пӧлеклалтше мероприятий-влак районлаште оҥайын эртеныт. Мутлан, Кужэҥер округысо тоштер-ончер рӱдерыште эртыше «Ӧрыктарышыже – воктенак» квест-модышыш Кужэҥер посёлкысо 2-шо №-ан школышто тунемше-влак кумылын ушненыт. «Ший» ийготан кугыеҥ-влаклан тоштер-ончер мучко экскурсийым эртареныт, кундемын эртыше жапышкыже пӧртылтышӧ виртуальный экскурсият нунылан оҥай лийын.
27 сентябрьыште Козьмодемьянск оласе А.В.Григорьев лӱмеш художественно-исторический тоштерыште «Юл кундемыште кокымшо Третьяковкылан» негызым пыштыше Александр Григорьев дене палдарыше лекций-влак эртеныт.
Марий Элым вуйлатыше Юрий Зайцев:
«Унам вашлиймаш кундемнан визитный картычкышкыже савырнен. Мыланна уло мо дене кугешнаш! Тений Марий Элыште «Чебоксар – Васильсурск – Юрино – Чебоксар» регион-влак кокласе маршрутым почмо. Йошкар-Олаште икымше марий турист троллейбус кудалышташ тӱҥалын. Августышто республикыште регион-влак кокласе «Йошка-еш» IV фестиваль эртен, тудо Российын 13 регионжо гыч – Мӱндыр Эрвел гыч Арктике марте – еҥ-влакым иквереш чумырен.
Тыгак Марий Эл «Диво России» фестивальыште ойыртемалтын: абсолютный лидер лийын. Республикна модыш кино гыч промышленный туризм дене кылдалтше номинацийлаште Гран-при да призан вер-влак дене палемдалтын. А «Россия твоими глазами» тӱнямбал конкурсышто мемнан регион «Гастрономические традиции» номинацийыште сеҥышыш лектын.
Козьмодемьянскысе у причал эҥер вӱд дене маршрут-влакым почаш ешартыш йӧным ыштен. Юрино посёлкышто причалым чоҥымо паша умбакыже шуйна. Аэропортышто самолётлан чоҥештен кӱзаш да волен шинчаш кумдык уэмдалтеш. Чыла тиде Марий Эллан туризм сферым вияҥдаш йӧным ышта.
Республикыште туризм отрасльым вияҥдымаште тыршыше чыла еҥлан тау, тыгак тау Марий Элыш турист семын толшо-влаклан!»
Г.Кожевникова
Фотом Марий Эл Республикыште туризм соцкылысе лаштык гыч налме.
