Геннадий Сабанцев
Кодшо шуматкечын, 23 августышто, Морко кундемысе Ӱшӱттӱр ял шке пайремжым эртарен, тудым М.Шкетан лӱмеш марий драме театр «Кавасе алаша» мурсеман комедийже дене сӧрастарен.
Тылеч ончыч Йошкар-Оласе ДОСААФ изирак аэрошоум эртара манын увертаралтын ыле, но тудо арнян чӱчкыдын йӱр йӱрмылан кӧра шоу ок лий манын ончылгоч каласышт. А теве «Кавасе алашалан» кава чаракым ыштен ыш сеҥе – йӱр лийын огыл гаяк.
Тиде кас ты кундемысе калыклан чынже денак пайремым пӧлеклен. Спектакльым сценыште ончымо – ик шот, йӧршеш вес шот да кумыл нӧлтмаш, кунам тудым пӱртӱс помышеш ончет: артист ден ончышо-влак коклаште ик тичмаш улмо шижмаш шочеш. Артист-влак шкештат вара чон почын каласеныт: ««Шкетан лӱмеш театрым Юмо йӧратенак-йӧрата, витне.
Саламлена эше ик сеҥымашна дене! Чыла коктеланымым да тургыжланымым ончыде, чылажат моткоч сайын лекте! Кӧ мыланна полшен, кӧ ончаш толын – чылалан кугу тау лийже!»
Спектакль деч вара воткыллаште еҥ-влак дечат ятыр куанле, тауштымо возымаш лектын. Теве икмынярже:
«Браво артист-шамычлан! Пеш чот келшен! Спектакльым театрыште онченам ыле, а ынде пӱртӱс лоҥгаште ончышым! Йӧршеш вес кумыл! Тау!» (Любовь Александрова).
«Пеш кугу таум каласена тыгай сылне касым эртарымыланда. Спектакль пеш чапле! Талантан артист-влаклан, чыла полышкалыше, организатор, ялысе пашаче калыклан вуйнам савена, таза да пиалан илыш корным тыланена. Умбакыжат у, сылне спектакль-влакым шочыкташ пиал лийже, аклыше ончышыда-влак шукын лийышт». (Ирина Булыгина).
«Мылам оҥай ыле: тиде постановкым таетрыште онченам, а пӱртӱс лоҥгаште кузерак модаш тӱҥалыт? Чынже денак, йӧршеш вес сынан спектакль. Пуйто чыла тыгак лийын. Самолёт веле ок сите. Молодцы! Браво! Пӱртӱс лоҥгаште спектакльым ончыкташ – тиде моткоч оҥай шонымаш. Садлан варажым тыге шоналтышым: могай постановко дене да кушто вес гана артист-влак калыкым куандараш тӱҥалыт? Усталык корныда волгалт шогыжо, йӧратыме Шкетан театр!» (Елена Лазарева).
P.S. М.Шкетан лӱмеш марий драме театр 29 августышто у тургымжым почын – Василий Пектеевын «Колумб» драмыж почеш спектакльым ончыктен.
Фотом М.Шкетан лӱмеш марий драме театрын воткылже гыч налме.
