Юрий Зайцев паша визитшым мучашлыме деч ончыч Шернур районысо калык дене вашлийын.
– Кызыт мый республик дене палыме лиям, районлашке, предприятийлашке лектын коштам. Кундемыштыда моткоч келшыш. Шернур сырзаводышто лийна, пеш чапле предприятий. Пурет – да шӧрла тугай тутлын ӱпша. Сырым итальян технологий дене ямдылат. Умылашат огеш лий, куштыжо тамлырак – тыште але Италийыште, – манын республикым вуйлатышын пашажым жаплан шуктышо.
Тудо районысо калыкын, поснак мӱйым ямдылыме бизнесым вияҥдыше, мӱкш семынак тыршен да келшен илыше шуко шочшан Шабдаровмыт ешын, ӧрыктарен куандарымыжымат палемден да социальный ойпидышын пайдалыкше нерген радамын каласкален. Тыгак шагал огыл нелылыкым ужмыж нерген ойлен. Нуно школым, корным, эрыктыме сооруженийым, физкультур да тазаҥдыме рӱдерым уэмден олмыктымо дене кылдалтыныт. А туризмым вияҥдыме пашам ик эн кӱлешан задаче семын палемден.
– Тыште марий Йӱштӧ Кугызан резиденцийже уло. Таче тудын марте миен ышна шу, но тушко корно кӱлмым палем. Резиденцийыш 2500 утла турист толын каен, тиде сай историй. Финансирований кӱлеш. Йӱштӧ Кугыза деке серыш да пӧлек дене кудалышташ йӧнанрак лийже манын, корнылан оксам ойыраш вигак гаяк пунчална, – манын регионым вуйлатышын пашажым жаплан шуктышо.
Вашлиймаш годым Юрий Зайцев районысо калыкын да чолга еҥ-шамычын посёлкышто Коммунистический уремысе корным олмыктымо, аварийнылан шотлымо пӧртлаште илыше-влаклан шуко пачеран у пӧртым чоҥымо да Йӱштӧ Кугызан резиденцийыштыже турист инфраструктурым вияҥдыме дене кылдалтше йодышыштлан вашештен.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
