Регион-влак кокласе форум
«Мыйын бизнесем. Мыйын ешем»
Йошкар-Оласе Калык-влакын келшымашышт пӧртыштӧ «Мыйын бизнесем. Мыйын ешем» регион-влак кокласе форум эртен да Еш идалыклан пӧлеклалтын.
Тудым «Мыйын бизнесем» рӱдер, Марий Эл Торгово-промышленный палате да «Альфа-Банк» АО-н Йошкар-Оласе отделенийже эртареныт. Форум еш бизнес да ты паша дене кылдалтше ведомство-влакын еҥыштым, предприниматель-влакым чумырен.
Еш идалык Российыште еш предпринимательстве системым саемден толмаште пале событийыш савырнен. Бизнеслан полшымаш регионлан экономике да социальный могырым ӱшанлын вияҥашыже да кушкашыже йӧным ышта. А тиде форум предпринимательстве сферыште ойыртемалтше палым кода. Тудын тӱҥ шонымашыже – еш бизнесын эн сай йӱлажым ылыжтымаш да шарен толмаш, экономикын кӱлешан секторжо семын тудын пеҥгыдылыкшым ончыктымаш. Тыге каласыме Марий Эл вуйлатышын саламлыме шомакыштыже. Тудым правительстве председательын икымше алмаштышыже Дмитрий Троицкий лудын пуэн.
Правительствын еҥже семын тудо палемден: Марий Эл Торгово-промышленный палате велым Еш предпринимательстве рӱдерым ышташ шонымо нерген темлымаш пурен. Ты рӱдер регионышто еш бизнесын представительже-влакын сай тӱҥалтышыштлан полшымо да тудым вияҥден толмо сомылым шукташ тӱҥалеш. Тидын негызеш нуно шке пашаштым чын корно дене виктарен колтат, еш династийым да шке брендыштым шочыктат, Марий Эл ден Российым тӱзатат.
Форумын пленарный заседанийыштыже Марий Эл Кугыжаныш Погын председательын алмаштышыже Александр Майоров ойлен. Тудо еш пашам тӱҥалаш да вияҥдаш шонышо-влаклан ты форумын кӱлешан улмыжым палемден. Опыт дене ваш-ваш палдарымаш кеч-могай бизнеслан кушкашыже полша. А еш дене ыштымаш тудым пеҥгыдемда, тукым кокласе кылым еш династийыш савыра, илышым улаҥдара.
Каҥашымашке ушнышо-влак еш предпринимательствыште палдырныше сай тӱҥалтыш, изи да кокла кугытан бизнеслан полшымо, республикыштына экономике, инвестиций да туризм дене кылдалтше ончыкылык нерген кутыреныт.
Вара мутланымаш «Еш бизнес: сай могыржо, ситыдымашыже да кушмо корно» теме дене эртен. Марий Эл, Татарстан, Чуваший, Киров область гыч компаний-влак еш бизнесым вияҥден толмо опытышт дене палдареныт.
Юрий ИСАКОВ
Снимкылаште: форумышто; А.Майоров; «Мастар кудо» вуйлатыше В.Кудрявцев.
Марий Эл вуйлатышын да Кугыжаныш Погынын пресс-службыштын, авторын фотошт
