19 апрельыште правительстве пӧртыштӧ Марий Эл Республикым вуйлатыше ден Узбекистанын Казань оласе генконсулжо Фарридин Насриев коклаште переговор эртен. Тушто Россий Иностранный паша министерствын Йошкар-Оласе представительже Лариса Полушина, верысе правительствын членже-влак да Марий кугыжаныш университетын ректоржо лийыныт.
Кок субъект коклаште образований сферыште пырля тыршаш да пайдале торгово-экономический кылым ышташ кумылан шонымаш ты вашлиймашым эртараш таратен.
Марий Элым вуйлатыше генконсулым кундемын илышыж дене палдарен, республикын промышленный, экономический да научный куатше нерген каласкален.
Фарридин Насриев тудым кугу уна семын вашлиймылан Александр Евстифеевлан таум каласен. Тудо Марий Эл ден Узбекистан Республик коклаште товарооборотым кугемдаш ямде улмым ончыктен да сатум кок кундемыштат ужалаш тӱҥалшашлан совместный предприятийлам почын кертме нерген шоналташ темлен.
Мый тендан бизнесменда-влак дене вашлийнем, нунын продукцийыштым ужнем, шкенан сатуна-влак дене палдарынем да переговорым эртарынем. Кок кундемысе изи да кокла кугытан бизнес коклаште кылым пеҥгыдемдыме пашам лач тышеч тӱҥалаш лиеш ыле, каласен генконсул.
Фарридин Насриев Марий Элым вуйлатышым 30-31 майыште Узбекистанысе Джизак олаште эртышаш Тӱнямбал инвестиционный форумыш мияш ӱжын.
Вашлиймаш пытыме деч ончыч тудо Александр Евстифеевлан Россий Федерацийын иностранный паша министрже Сергей Лавровын пуымо Консульский патентым кучыктен.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
