Тыгайже идалык мучко шагала огыл лийын. Чылажымак каласен пытарашат огеш лий. Ме поснак ойыртемалтшыштым чумыренна. Теве – икмынярже:
18 мартыште Россий президентым сайлышна. Тушто, палена, Владимир Путин чылаштым ончылтен. Пӱтынь Россий мучко тудын верч 76,69 процент еҥ йӱклен. Марий Элыште 73,99% сайлыше шке йӱкшым пуэн.
Россий Президент Владимир Путинын Марий Эл вуйлатышылан Александр Евстифеевым темлымыжлан да тудын пашам ышташ тӱҥалмыжлан 6 апрельыште ик ий темын.
Марий Эл Республик Вуйлатыше Александр Евстифеевым Россий правительствын Россий Федерацийыште региональный вияҥмаш шотышто комиссийышкыже пуртеныт. Тидын нерген пунчалым Россий правительстве председатель Дмитрий Медведев 17 апрельыште подписаилен.
25 майыште Марий Эл Республик Вуйлатыше Александр Евстифеев RUS EDUCATION-ын директоржо Сайед Кумру Заман дене вашлийын. Тушто ончыкыжым Йошкар-Олаште йот студент-влаклан европысо кӱкшытан кампусым чоҥаш тӱҥалме, тидлан Индийын 2 млрд. наре теҥгем ойырымыж нерген мутланен келшеныт.
29 майыште Москва областьын правительствыштыже «Изи олала ден исторический илемлаште тачысе илышлан келшен толшо ола кумдыкым тӱзатымаш – эн сай проект» всероссийский конкурсын финалже эртен.
Конкурсыш Россий Федерацийын 82 субъектше гыч 455 йодмаш пурен. Сеҥышыш 80 ола лектын. Тиде радамыш Марий Эл гыч Звенигово ола логалын. Тиде муниципал образованийын «Эҥер сер – Звенигово олан чонжо» проектше «10 тӱжем гыч 20 тӱжем еҥ марте чотан изи ола-влак» номинацийыште сеҥыше-влак коклаште лийын.
2 сентябрьыште Марий Элыште икмыняр вере кудымшо созыв Кугыжаныш Погыныш депутат-влакым ешарен сайлыме.
10 октябрьыште Москваште, ВДН-ште, «Шӧртньӧ шыже» Российысе агропромышленный выставке 20-шо гана почылтын. Тушто кундемнан предприятийже ден агропромышленный комплексше-влак тӱрлӧ номинацийыште кӱкшӧ награде дене палемдалтыныт. Мутлан, «Сай качестван кочкыш продукцийым ямдылымылан» шӧртньӧ медальым «Звениговский» шыл комбинат» ООО, «Шернур сыр завод» ЗАО, «Солюд» ООО, «Семёновский племзавод» ЗАО, «Йошкар-Оласе хладокомбинат» ООО, «Чай Руси» ООО, «Акашевский» сурткайык фабрике» ООО, «Йошкар-Ола шыл комбинат» ЗАО, «1-ше №-ан кинде завод» ООО, «Марий Турек райпон коопзаготпромжо» ООО налыныт.
Марий Эл икымше гана «За вклад в развитие выставки» гран-при дене палемдалтын. Кундемнан производительже ден предприятийже-влак Российын рӱдолаж гыч чылаже 36 медальым конденыт: 29 шӧртньым, 4 шийым да 3 бронзым.
Октябрь кыдалне Марий Эл Республик вуйлатыше Александр Евстифеев ден Беларусь Республикын премьер-министржын алмаштышыже Игорь Петришенко вич ийлан ваш келшен пашам ыштыме нерген ойпидышым подписатленыт.
25 октябрьыште Марий Эл Республикын Антикризисный рӱдерыштыже Юл кундем федеральный округын да Пӱртӱсым аралыме Волжский межрегиональный прокуратур-влакын почылтшо межрегиональный форумышт эртен. Тушто тӱҥжӧ Юл эҥерым, тудын яндарлыкшым арален кодымо нерген мутланеныт.
20 ноябрьыште Шернур районысо Кукнур селашке да ты ял шотан илемысе 6 ялышке пӱртӱс газ толаш тӱҥалын. Тудым Марий Эл Республик вуйлатыше Александр Евстифеев шкежак чӱктен.
3-5 декабрьыште Москваште, Федераций Советыште, Марий Эл Республикын кечыже-влак эртеныт. Тушко кундемна гыч кугу делегаций миен. Тиде мероприятий жапыште 7 комиссийыште ончыкыжым Марий Элым вияҥдаш полшен кертше ятыр пунчалым луктыныт. Ынде нунын илышыш шыҥдаралтмыштым вучаш тӱҥалына.
Любовь Камалетдинова ямдылен.
