… Ик кас чумыр илышым вашталтыш, тура, кочо савыртышым ыштыш. Тунам Андрей молгунамсылак дежурствыш тольо, полышкалышыжлан медшӱжар Лидам колтышт. Лида йывыртыш веле да шканже ойым ыштыш: «Таче огыл гын, нигунам». Эх, ман, йӱдшат ваш ушнашланак пуалтын улмаш ала-мо?
Полышым йодын толшо, ӱжшат ышт лий. Лида писын кочкаш погыстарыш, спиртым муын кондыш.
– Андрей Сергеевич, айда ӱстелтӧрыш. Йӱд кужу, эр марте кочде чыташ нелырак, – семален ончале шинчашкыже Лида.
– Кугу тау, Лида. Мыланем черлым ончал толаш кӱлеш, – Андрей ӱдыр велыш ышат ончал.
– Ида торешлане, тыште нимо удажат уке, – Лида тугак ынеж чакне.
– Ну йӧра, йӧра, – келшыш Андрей да ӱстел коклаш шинче. Лида тунамак воктеныже верланыш, куанжым шылтен кертде, чарныде тӱрлым кутыркалыш, воштылтыш. Вара мыскара йӧреак спиртым лукто, коркаш пыштыш. Андрей, тидым ужын, ӧрмалген ӱмбакыже ончале.
– Палыме лийме лӱмеш изиш подылына, – Лида пӧръеҥын кидшым шыман кучыш. Весым пагалаш тунемше Андрей адакат чакныш, ойжо дене келшыш. «Арака ушым налеш» манмым эреак шарныман, но Андрей «Изиш подылмо нимат огыл» шоналтен докан. Вес чаркамат куштылгын нӧлтале. Йӱын тунемдыме Андрей писын рушто, а Лидалан тидак веле кӱльӧ. Чон шижмашыжым кучен кертде, йӧратыме еҥжым ӧндале, шупшале… Тылеч вара самырык пӧръеҥ ӱдырамашын шокшо шӱлышешыже аҥыргыш, медшӱжарлан шыргыжал вашешташ тӱҥале, кораҥ коштмымат чарныш. Чоныштыжо ала-могай вашталтышым шиже: чонжо Лида верч йӱла, но пелашыжымат ончычсылак йӧрата.
Катя еҥ мутым ыш колышт, адакшым Андрейже тудым тугак йӧрата, шоныш. Вет пелашыжын койыш-шоктышыштыжо вашталтыш уке гаяк чучеш. Йӧратыше шӱм осал шомакым ушышко пышташ тореш лие. Но лишыл йолташ ӱдырамашын каласкалымыже тудлан ӱш дене перыме гаяк лие, ушым пудыратыш, чоным когартыш.
– Лида мариет деч азам ыштен, эргыже чылт Андрей гай коеш, – шинчашкыже туран ончалын каласыш Соня. – Катя, тый ушан улат, манеш-манешымат шукертак колынат… Ала ойлымат огеш кӱл ыле, но Андрейын тыйым ондалымыжым тетла чытен ом керт. Чыным кунам-гынат палышаш улат, – шып пелештыш.
Катян шӱлыш корныжо петырныш, шӱмжӧ пуйто кырымым чарныш. Йолташ вате шойышташ огеш тӱҥал.
Любовь МАМАЕВАН ойлымашыжым 2021 ий 2 ноябрьыште лекше газетыштына лудса. «Марий Эл» газетлан подпискым ышташ вашкыза!
