Марий Элым вуйлатыше Юрий Зайцев Запорожский областьыш миен.
Республикнан могай полышым ыштен кертмыжым пален налаш манын, Ю.Зайцев Запорожский областьыш шкеак миен коштын. Тушто губернаторын икымше алмаштышыже Сергей Толмачев дене коктын кӱлешан мероприятий-влакым палемдыме жапыште шуктымо шотышто келшыкым ыштеныт.
Ю.Зайцев поснак образований да социальный обслуживаний аланлан тӱткышым ойырен. Документ дене келшышын, Марий Элын правительствыже тунемме ден сылнымут литературым, шинчымашым пуымо организацийлашке спорт инвентарьым налаш, икымше классыш тарваныше ӱдыр-рвезе-влакым школыш погаш полша. Тылеч посна Куйбышев районышто илыше йоча-шамыч кеҥежым Марий кундемысе ола деч ӧрдыжысӧ лагерьлаште канен кертыт.
Кок регионын кучем органыштын пашам пырля ыштымышт дене инфраструктурым нӧлталаш, Запорожский областьыште илыше-влаклан сайын илаш, тунемаш да пашам ышташ йӧн лиеш, палемден Марий Элым вуйлатыше.
«Ме ӧрдыжтӧ кодын огына керт. Запорожский областьын ик кумдыкшым шефствыш налаш пунчалынна. Ик эл гыч улшо калыкын, поснак йоча-влакын, националист-шамычын пытарыме ола ден селалаште кузе илымыштым ужын, мом шижмым мут дене каласен мошташат огеш лий. Нунын ны квалифицироватлыме медицине полышым налаш, ны тунемаш йӧнышт уке. Чыланат просто тыныс илышым вучат. Мыйын позицием – мут дене огыл, а паша дене полшаш. Марий Элыште илыше чумыр калык мый денем келша манын ӱшанем, вет россиян-влак шкенан-шамычым огыт кудалте!» – палемден Юрий Зайцев.
С.Толмачев Марий Элым вуйлатышылан Запорожский областьыш толын коштмыжлан да полшымыжлан тауштен.
«Жапым мумыланда, объект-влакым ончал савырнымыланда, йодыш-шамычым верлаштак да неле условийыште решатлаш полшымыланда кугу тау», – манын тудо.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
