Мут — делегатлан
Пошкырт кундем Мишкан районысо тӱвыра виктем вуйлатыше Радион Плотников:
– XII Марий калык погыныш тиде гана мый делегат семын да тыгак Башкортостан Республикын правительствыжын кӱштымыж почеш регионын представительже семын каем. Тыглай илышыште шуктен толмо тӱҥ пашам н творчестве дене кылдалтын, тидлан кӧра мый «Еш да тӱвыра» секцийыш ушнынем. Мер пашаеҥ улына, сандене шочмо йылмым аралаш, йӱлам, тӱвырам вияҥдаш, пойдараш полшышо шуко тӱрлӧ мероприятийым шкенан дене эртарена. Кеч-могай мероприятийлан роскот сметым ыштыман. Тидлан кӧра ме грант конкурслаш шке проект дене эреак ушнаш тыршена да сеҥышыш лектедена. Поснак мер пашаште грант шийвундым сеҥен налмаш – кугу полыш. Мемнан республикыште тыгай конкурсшо шуко увертаралтеш гынат, сеҥышыш лекташ куштылгыжак огыл. Санденак Погынлан темлынем: ала лиеш ыле Марий Эл Республикым вуйлатышын грант фондыштыжо тыгай направленийым палемдаш, кудыж почеш Российын тӱрлӧ лукыштыжо илыше марий-влакын чумырымо коммерческий огыл организаций-влаклан марий йылмым, тӱвырам, йӱлам вияҥден колташ полыш ойыралташ тӱҥалеш.
