Кызыт Йошкар-Олаште, Чарла Кремльыште, кажне шуматкечын район-влак шке усталыкышт ден кидпаша мастарлыкыштым ончыктат. Тидыже республикысе калык усталык да тӱвыра ден каныме паша шотышто шанче-методике рӱдерын «Республикна икоян улмыж дене виян» республиканский фестиваль-конкурсшын программыж кышкарыште эртаралтеш.
2 июльышто Юрино, Морко, Советский да Шернур район-влак куандарышт. Тиде кечын Кремльыште нине кундемла гыч тӱрлӧ учреждений, организаций ден посна кидмастар-шамыч шке пашаштым ончыкташ конденыт. Нунын коклаште ик эн шукыжо марий тӱран вургем, сӧрастарыш лийыныт. Тыгак пидме носки, пижерге, тапычке, кӱртньӧ ден калай гыч ыштыме тӱрлӧ ӱзгар, сӱрет-шамыч, ӱпыш пижыкташ заколко, алга да ятыр моло улыт ыле. Адакшым чыла тидым ончаш веле огыл йӧн лийын, кӧлан мо келшен гын, вигак налынат кертын.
Тыгак, мутлан, Советский районысо Ӱшнӱр кыдалаш школын туныктышыжо шке кидпашаже-влак выставкым чумырымо дене пырля эше кумылан-влаклан шун гыч ненчаш туныктымо мастер-классымат эртарен. Тиде район гыч толшо-шамычак куэм гыч агытаным кузе ышташ лиймым ончыктеныт. «Кугезе кумыл» ансамбльыш коштшо-влак гын тиде жапыште кӱнчылам шӱдырен, тӱрым тӱрлен шинченыт.
А Юрино район гыч фестивальын участникше-шамыч шӧр да шӧр продукций гыч шке ыштыме тӱрлӧ сийыштым: сырым, «сакырым», йогуртым, торыкым, икмыняр молым – тамлен ончаш конденыт. Мыят нуным кочкын ончышым. Чылажат моткоч тамле ыле! Изиш гыч веле пурлальым гынат, тылеч вара кужу жап кочмо шумым ыжым шиж… Арам огыл нунын театрализоватлыме пайремыштат «Молочный рай» маналтын.
Кокымшылан калык ончыко Морко район лекте. Ты кундем гыч толшо-влак «Коҥга пайрем» сценкым ончыктышт. Тыгодым тиде пайрем дене палдарыме дене пырля эше погынышо-шамычымат мурыктышт, куштыктышт, туштым туштышт, еҥ-шамычын коҥга дене кылдалтше калыкмут-влакым палымыштымат тергышт да ойыртемалтше-влаклан пӧлекым кучыктышт.
Шернур районын делегацийже «Семык» пайрем кузе эртаралтмым кӱчыкын ончыктыш. Ты кундем гыч толшо-шамычат еҥ-влакым пырля куштыктышт, мурыктышт, южыжым эсогыл сценке деч вара «черже, осалже кайыже» манын, выньык дене почкалтарышт.
Пайрем-влак дене палдарыме деч вара кажне район этнокасым эртарыш. Юрино районын тудо «Зажигай по-юрински!», Шернур районын «Шернур кундемем моктен мурем», Советский районын «Ме Советский улына, ой, чот чаплын илена» маналтыныт. А Морко район Келшымаш хороводым эртарыш.
Пытартышлан кажне районын участникше-шамыч погынышо-влакым тӱрлӧ модыш дене модыктышт.
Икманаш, кӧ кодшо шуматкечын Чарла Кремльыш миен гын, жапшым тушто эртарымылан иктат ӧкынен огыл, шонем. А, мӧнгешла, чонжым кандарымылан йывыртен, тушеч моткочак нӧлталтше кумылан каен!
Любовь Камалетдинова
Авторын фотожо
