Йошкар-Оласе В. И. Ленин лӱмеш тӱвыра полатыште «Изи гармоньчо» конкурс эртен. Тений тушто Марий Эл, Пошкырт да Виче кундемла гыч изи гармоньчо-влак шкетынат, ансамбль денат мастарлыкыштым ончыктеныт, а тиде – 18 солист ден ансамбль да 5 еш коллектив.
Ойырен налме турышто нуно марий композитор-влакынат, тыгак шке велысе гына огыл калык семымат йоҥгалтареныт. Репертуарыштым, сценыште шкем кузе кучымыштым, залын вашлиймыжым аклыше жюриште калыкыште пагалымашым сулышо семмастар-влак лийыныт.
Конкурсыш ушнышо кум ияш гармоньчо Рома Марков поснак куандарыш. Ачаже Александр Марков дене пырля гармоньымат шоктен, муралтен-тавалтен шоген. Изи кидше дене микрофонымат шке велкыже профессионал семын савырал моштымыжо куандарен. Ачаже семынак кертеш улмаш.
Еш ансамбль-влакым мокталтыман. Пошкырт кундем Калтаса район Амчемучаш ял гыч ача ден эрге Андрей ден Иван Петраевмытым ойлыманат огыл. Эн чотшо изи полмезе калыкын кумылжым налын: туге шокта да мура, эсогыл сем савыртышым чурийже ден капкылжын кажне ужашыж дене шижеш да моторын почеш. Иван гармоньым шкет шоктышо-влак коклаште конкурсын Гран-прижым сеҥен налын.
Еш усталык коллектив ача-ава, коча-кова да икшыве-влак коклаште кылым пеҥгыдемдаш полша, кушкын шогышо тукымым кугурак-шамычым пагалаш туныкта. Нунын коклаште поснак Кужэҥер посёлко гыч Петуховмыт ешым палемдыман. Туде кум еш тукым:¬ Татьяна Эрнестовна ден пелашыже Владислав Альбертович, Кирилл ден Тимофей эргышт, Юлианна ӱдырышт да ача-кочашт Эрнест Николаевич. Кирилл ден Тимофей посёлкысо сымыктыш школышто баян дене шокташ тунемыт. Юлианна йочасадыш коштеш. Авашт – «Шымавий» фольклор ансамбльын участникше. Владислав Альбертович шӱвырым мастарын шокта, а кочалан еш ансамбльыште тӱмырым пералташ ӱшаненыт.
Зал тыгак Параньга вел Ермучаш гыч Гордеевмыт, Киров кундем гыч Перескоковмыт ешым шокшын вашлийын. Перескоковмыт еш марий тӱвыра аланыште шукертак «пӧрдыт». Авашт, Людмила, Йошкар-Олаште тӱвыра да сымыктыш колледж деч вара шочмо велыш пӧртылмеке, тусо тӱвыра пӧртыштӧ ышташ тӱҥалын. «Родион эргым гармоньым пел ий ончыч кидышкыже налын. Тидлан шӱкалтышым гармоньчо Александр Лопкин ыштен. Концерт дене толмыж годым эргымлан шоктен мурымыжо моткоч келшен. Семӱзгарым налын пуаш йодын да тудын репертуарже гыч икмыняр мурым тунемын. Ынде тудо мыйын вуйлатыме «Ош пеледыш» фольклор ансамбльыштат шокта. Конкурсышто кокымшо верым налмыже моткоч куандарен», – кугешнен ойла ава.
Гордеевмытын еш ансамбльже ныл тукымым уша. Эргыже-влак Игнатий ден Константин сеҥыше-влак радамыш логалыныт.
Конкурсышто сеҥыше-влакым тӱрлӧ ийготан-влак коклаште палемденыт, кажнышт нерген ойырен ойлаш лиеш. Но поснак шке гыч гармоньым шокташ тунемше-влакым мокталтыме шуэш. А тыгайже конкурсыш эсогыл латкокытын лийыныт! Марий Турек район Арбор велысе тӱвыра пӧрт эсогыл ныл уста икшывым конкурсыш колтен!
Семӱзгарым шоктышо ансамбль-влак коклаште Гран-при дене республикысе Марий тӱвыра рӱдерын «Падыраш» йоча фольклор ансамбльже палемдалтын (вуйлатышыже – Марий Элысе тӱвыран сулло пашаеҥже Эльвира Петрова). Нине изи артист-влак чынжымак сеҥымашым суленыт. Гран-прим налше-влаклан кубокым кучыктеныт. А рӱдерын да спонсор-влакын ямдылыме пӧлекышт кажне участниклан логалын.
С.Носова
Снимкылаште:Иван Петраев саламлымашым налеш
Р.Николаеван фотожо
