МАРИЙ ЙӰЛА

Йулана тек илана: Тек ото шукрак лиеш

«Марий ото шукырак лиеш гын, тыште нимо удаже уке, — ойлат Марий юмыйӱла ушемын Йошкар-Оласе общиныжын еҥже-влак. Тыгай шонымаш денак нуно кодшо рушарнян кумалтышым у отышто эртареныт. Тудлан  Йошкар-Ола воктенсе Тумер отышто верештыныт. Тудо кумдыкым нуно ончылгоч тӱшкан погынен эрыктеныт да тӱзатен шынденыт. Тулолмылан, шагылан верым келыштареныт, онапум палемденыт. Йӧрлшӧ пушеҥге, укш-влакым, уто кушкылым кораҥденыт, «уремыш коштмо» верым ыштеныт. Пеш сылне да ласка вер. Воктенак Изи Какшан эҥерын «укшыжо» шыргыктен шинча, йырым-ваш якте писте ден тумо, кож  кушкыт. Тушто ынде  Мер Юмылан кумалаш тӱҥалыт. Онапужлан писте ден тумым ойыреныт. Мужыр дене илаш сайрак. Отыш кумалаш пурымо годымат капкаш пурымо семынак,  мужыр дене шогышо мотор тумо кокла гоч кайыман. Шыже тӱсым налше ото чынжымак чоным сымыстара да лыпландара.

Тумерыште ты ото кокымшо. Изиш тораштырак вес отыштыжо Курык Кугызалан 2003 ий гычак кумалаш коштыт. Сандене Тумер Йошкар-Оласе марий-влакын жаплыме верышкыже савырнен манашат лиеш. У кумалтыш верыш калык шукыжак погынен огыл ыле, кеч тидын нерген увер марий изданийлаштат, радиоштат лийын. Кумалме радам шке ратше дене пеш ласкан эртыш. Тений тушто ик тулолмо дене Мер Юмылан, Мер Юмын Аважлан да Пиямбарлан пелештен шогышт. Надыр шотеш шулдыраным, тага ден шорыкым надыр шотеш пуышт, Юмылан пелештен шогымо радамым общинын Тӱҥ онаеҥже Юрий Тушнурцев эртарыш. Тудлан Советский районысо онаеҥ Петр Григорьев полшыш.

Кумданрак — «Марий Эл» газетын
2017 ий 28 октябрьыште лекше номерыштыже лудын кертыда.

Светлана Носова.
М.Скобелевын фотожо.

Опубликовать в Одноклассники

Добавить комментарий