«Марий Эл» газетнан ВКонтакте соцкыл лаштыкыште увертарыме «Окнаште алын-ошын пеледыш пеледеш» конкурсыштыжо посна пӧлек дене Морко район Шеҥше селаште шочын-кушшо, а кызыт ешыж дене Йошкар-Олаште илыше Кристина Абросимова палемдалтын. Тудын денак таче мутым вашталтена.
– Кристина, соцкыл лаштыкыштына конкурс увертаралтме нерген пален налмеке, тушко ушнаш вигак кумылет лектын? «Весе-шамычын пеледышышт ала сылнырак, тугеже фото-шамычым колташат нимолан» манме кокытеланыме шонымашет лийын огыл?
– ВКонтакте соцкылыште «Марий Эл» газет – поро йолташет» тӱшкашке мыят ушненам гынат, конкурс увертаралтме нерген возымым ужын омыл. Тидын нерген ик шӱжарем пален налын да фото-влакым тудак колтен.
Пеледышлан мый авам, ковам деч шӱмаҥынам, очыни. Нунат ончыч шуко шынденыт. Вараже кеч-кушто лиймем годымат иктаж пеледыш келшен гын, игыжым налын конденам.
Кызыт пачерыштына веле огыл, шке ачам-аваммыт денат, пелашеммытын пакчаштыштыштат ятырак шындем. Петуний, калибрахоа, фуксий, колеус, молат улыт. Пытартыш жапыште розам куштен ончаш кумылем лектын. Але марте кум сорт лийын. Ӱмаште эше ныл тӱрлым налынам.
– Поснак чот йӧратыме пеледышет могай?
– Тыгай кызыт уке. Ончыч, мутлан, фиалкым ужынам, тудым тӱрлӧ сортым шындылынам да ты пеледышым эн чот йӧратем, шоненам. Вара петунийым шындаш кумылаҥынам да тудым эн чот йӧратем манын шоненам. Тыгай шонымашем кажне у пеледышым ужмекем лийын. Ынде пачерыштына могай уло, чылаштымат йӧратем: калатеям, стрептокарпусым, традесканцийым, хлорофитумым, бегонийым… Эшежым нуно кажныже икмыняр тӱрлӧ улыт.
Интернетыш пурем да иктаж-могай пеледышым ужам гын, налде ом чыте. Мутлан, аглаонемым Таиланд гыч выписатленам. Теве кызыт гына ик маркетплейс гыч лу тӱрлӧ эустомым налын тольым. Но пеледыш-шамычым чотыштлан кӧра огыл шуко шындем. Мый кажныже сайын койжо, а шылтен шындыме семын ынже лий манын тыршем.
– Пеледышым ончен-куштымо деч посна тый эше тӱрлӧ кидпашам ыштет. Чыла тидлан кузе кумылаҥынат? Жапшым кузе муат? Вет ныл шочшан ава улат.
– Туге. Денис пелашем дене ныл шочшым куштена. Александра ден Анастасия йыгыр ӱдырна-влак 12 ияш улыт. Илья – 9 ияш. А нылымше Анна ӱдырна ик кече гыч вич тылзым тема.
Кеч-можымат утларакше нунын дене декрет отпускышто улмем годым ышташ тӱҥалынам. Пидаш гын школышто тунемшак кумылаҥынам. Тунам кокам деке малаш коштам ыле. Тудын да икмыняр ӱдырамашын марийышт пашам ышташ умбаке кудалыштыныт. Кастене кажныже, шкет шинчаш огыл манын, кокам деке толыныт да мом-гынат пидыныт. Мыят, ончен веле шинчаш огыл манын, пидаш тунемынам. Школ деч вара тунемаш кайымеке, ик жаплан тиде сомыл ӧрдыжеш кодын. А, йочам ыштымеке, ты кидпаша деке угыч пӧртылынам да йочана-шамычлан пальтом, комбинезоным, пинеткым, вараже упшым, шарфым, пижым, узоран носким … пидаш тӱҥалынам.
– Пушкыдо модыш-шамычымат пидат.
– Модышым пидаш кумылем лекмеке, интернетыште ик видеом гына ончышым да тунемымат. Тӱҥалтыште плюшевый манмым ятыр пидынам, вара, курчакым ужмеке, тудымат пидынам. Ятыржым икшывына-влак йолташышт-шамыч деке шочмо кечышкышт кайыме годым пӧлеклан наҥгаеныт. У ий деч ончыч йодмо почеш ик тылзе жапыште вич модышым пидын пуышым.
Тыгак шинчалан руаш гыч мом-гынат ыштен ончымем шуын да утларакше пеледышым, аршашым ненчен, «сӱретым» келыштаренам. Нуныжым шке кӧлан-гынат пӧлеклылнам.
– Кидпаша деч посна тый эше лачка кочкышым ямдылет: тортым кӱэштат, зефирым ыштет.
– Тортым шукертсек кӱэштам. А зефирым гын визымше ий ыштем. Тудым кузе ямдылышашымат интернетыште ужынам. Вара икмыняр видеом онченам, кӱлеш инструментым изин-изин наледенам да ямдылаш тӱҥалынам. Кӧ тидын нерген пала гын, нуно кызытат ыштен пуаш йодыт. Шкенан йочана-шамыч зефирем, кевытыште налме дене таҥастарымаште, куаненрак кочкыт. Адакшым мый тудым ужалымаште улшо гай форманым огыл, а пеледыш, пеледыш аршаш сынаным да тӱрлӧ тӱсаным ыштем.
Чыным ойлаш гын, мутлан, телевизорым тыглай гына ончен шинчен ом керт. Мылам тиде жапыште эше мом-гынат ышташ кӱлеш. Тыгеак, мутлан, ротанг гыч кашпом пидмым шукерте огыл ужмеке, семынем шоналтенам: «Тыгайжым мыят ыштен ом мошто мо?» Пидын ончышым. Лекте. Тачысе кечылан гын иктаж латвизыт нарат погынен. Мыняржым пачерыште коденам, мыняржым ялыш наҥгаенам. Мый мом ум ужам, чыла ыштен ончымем шуэш.
Любовь Камалетдинова
Соцкыл лаштык гыч налме фото
