Еш идалыкыште Марий Элыште кугу тӱткыш йоча-влаклан ойыралтеш.
14 августышто «Журавушка» социально-реабилитационный рӱдерыште йочам ашнаш налше ден опекун еш-влаклан «Йолташ-влакын вашлиймашышт» мероприятий эртен. Тудо Россий Федераций президент Владимир Путинын увертарыме Еш идалыклан пӧлеклалтын.
Марий Элым вуйлатыше Юрий Зайцевын кӱштымыж почеш мероприятийыште республик правительстве председательын икымше алмаштышыже Михаил Васютин лийын. Тудо рӱдерын специалистше да еш-влак дене вашлийын.
Михаил Васютин палемден: тиде событийын тӱҥ задачыже – йочам ашнаш налше ден опекун еш-влакын статусыштым нӧлталаш, тыгак ача-авадыме йоча-влаклан еш умылымаш дене кумдан да келгын палдараш, тудын тӱрлӧ улмыжым да кӱлешлыкшым ончыкташ.
Вашлиймашын участникше-влак шкешт дене палдареныт, усталык номерым ончыктеныт. Тыгак нуно психологий тренинглаште, мастер-класслаште лийыныт, а ийготыш шудымо-шамыч профессиональный тестированийым эртеныт.
Тиде вашлиймаш деч вара Михаил Васютин Волжский район Пӧтъял да Волжск оласе 6-шо №-ан школлаште лийын. Икымшыштыже кызыт капитально олмыктымо паша умбакыже шуйна. Тушто олтымо, вӱд, канализаций системылам да пищеблокым уэмденыт, пырдыжым чиялтеныт, спортзалыште у кӱварым шареныт. Олмыктымо пашам 95 процентлан шуктымо, у тунемме ий вашеш тудо мучашлалтеш.
Волжск оласе 6-шо №-ан школым аварийный радамыш пуртымо, сандене тушко коштшо йоча-влакым 12-шо №-ан общеобразовательный организацийыш кусареныт. Тушто тунемше-влаклан 16 кабинетым ямдыленыт, тыгак тӱҥалтыш школын спортзалжым, кокымшо пачашысе фойем олмыктеныт, окнам вашталтеныт да моло пашам шуктеныт. Чыла тидлан республикын бюджетше гыч 6 миллион теҥге ойыралтын.
Михаил Васютин палемдыме тунемме верлаште уэмден олмыктымо пашам терген, подрядный организацийын пашаеҥже-влак дене мутланен. Тудо палемден: общеобразовательный организаций-влак у тунемме ийлан ямде лийшаш улыт.
Марий Эл Республикым вуйлатышын пресс-службыжын уверже негызеш Г.Кожевникова ямдылен
